THE NEWS PLUS PORTAL FOR THE DISCERNING INDIANS OVER THE GLOBE

Friday, May 20, 2022

THE NEWS PLUS PORTAL FOR THE DISCERNING INDIANS OVER THE GLOBE

Home America 'ഇനിയും ക്ഷമിക്കാനാകില്ല, ലൈംഗികബന്ധം വേണം'; ആപ്പിള്‍ മേധാവിയെ ശല്യം ചെയ്ത യുവതിക്കെതിരെ നടപടി

‘ഇനിയും ക്ഷമിക്കാനാകില്ല, ലൈംഗികബന്ധം വേണം’; ആപ്പിള്‍ മേധാവിയെ ശല്യം ചെയ്ത യുവതിക്കെതിരെ നടപടി

വാഷിംഗ്ടൺ: ഒരു വർഷത്തിലേറെയായി ആപ്പിൾ സിഇഒ ടിം കുക്കിനെ ഭീഷണിപ്പെടുത്തുകയും ശല്യം ചെയ്യുകയും ചെയ്ത യുവതിക്കെതിരെ നടപടി. ജൂലിയ ലീ ചോയ് (45) എന്ന സ്ത്രീയെ വിലക്കിക്കൊണ്ടുള്ള കോടതി ഉത്തരവുണ്ടായി. കാലിഫോർണിയയിലെ സാന്റാക്ലാര കൗണ്ടി സുപ്പീരിയർ കോടതിയാണ് കേസിൽ വിധി പറഞ്ഞതെന്ന് വിദേശ മാധ്യമങ്ങൾ റിപ്പോർട്ട് ചെയ്തു.

കുക്കിനെതിരെ യുവതി നടത്തിയ ഇടപെടലുകൾ ശരിവെച്ച കോടതി കുക്ക് ഉൾപ്പെടെയുള്ള ഏതെങ്കിലും ആപ്പിൾ ജീവനക്കാരുമായി ഇടപഴകുന്നതും വിലക്കി. ആപ്പിളിൻ്റെ ഏതെങ്കിലും സ്ഥാപനങ്ങളിൽ യുവതിക്ക് പ്രവേശിക്കാൻ അനുമതിയില്ല. വിലക്ക് ലംഘിച്ചാൽ ജയിൽ ശിക്ഷയും പിഴയും ഈടാക്കുമെന്നും കോടതി പറഞ്ഞു. ജൂലിയ ലീ ചോയ് സിലിക്കൺ വാലി സ്വദേശിനിയാണെന്ന് കുക്കിൻ്റെ അഭിഭാഷകൻ കോടതിയിൽ പറഞ്ഞു. യുവതി ആപ്പിൾ സിഇഒയുടെ വസതിയിലേക്ക് വീണ്ടും അതിക്രമിച്ച് കയറാൻ സാധ്യതയുണ്ടെന്ന് അദ്ദേഹം വ്യക്തമാക്കി.

ടിം കുക്കിനെ നിരന്തരം ശല്യം ചെയ്തതോടെ കമ്പനിയാണ് പോലീസിൽ പരാതി നൽകിയതെന്നാണ് റിപ്പോർട്ട്. കഴിഞ്ഞ ഒരു വർഷമായി മോശം രീതിയിലുള്ള ഇ മെയിൽ സന്ദേശങ്ങൾ യുവതി അയക്കുന്നുണ്ടെന്ന് കമ്പനി വ്യക്തമാക്കി. 2020 ഒക്ടോബർ മുതൽ നവംബർ വരെയുള്ള കാലയളവിൽ ഇ മെയിൽ മുഖേനെ 200 ഓളം സന്ദേശങ്ങളാണ് യുവതി അയച്ചത്.

സ്വന്തം രാജ്യത്ത് നിന്നും എത്തിയ യുവതി താൻ അദ്ദേഹത്തെ കാണാൻ യുഎസിലേക്ക് എത്തിയതാണെന്നും അദ്ദേഹത്തിൻ്റെ ഭാര്യയാണ് താനെന്നും അവകാശപ്പെട്ടിരുന്നു. തങ്ങൾക്ക് ഇരട്ടക്കുട്ടികൾ ഉണ്ടെന്ന് യുവതി പ്രചരിപ്പിക്കുകയും ചെയ്തു. ട്വിറ്ററിലൂടെ ലൈംഗികച്ചുവയുള്ള സന്ദേശങ്ങൾ യുവതി പതിവാക്കിയതോടെയാണ് നിയമനടപടികളിലേക്ക് കടക്കാൻ കമ്പനി തീരുമാനിച്ചത്. ട്വീറ്റുകളിൽ പലതും ടിം കുക്കിനെ ടാഗ് ചെയ്തുള്ളവയായിരിന്നു. കുക്കുമായി താൻ ലൈംഗികബന്ധത്തിന് ആഗ്രഹിക്കുന്നുണ്ടെന്നും ഇനിയും തൻ്റെ ക്ഷമ പരീക്ഷിക്കാനാകില്ലെന്നും ഇവർ ട്വിറ്ററിലൂടെ പറഞ്ഞിരുന്നു. 50 കോടി ഡോളർ കുക്കിൽ നിന്നും യുവതി ആവശ്യപ്പെട്ടതായും റിപ്പോർട്ടുകളുണ്ട്.

കുക്കിൻ്റെ വസതിയിലേക്ക് അതിക്രമിച്ച് കയറാനുള്ള ശ്രമത്തിനിടെ 2021ലാണ് യുവതി പിടിയിലായത്. കാറിലെത്തിയ യുവതി അനുവാദം കൂടാതെ ഉള്ളിലേക്ക് കടക്കാൻ ശ്രമിക്കുന്നതിനിടെ പിടിയിലാകുകയായിരുന്നുവെന്നാണ് വിദേശമാധ്യമങ്ങൾ റിപ്പോർട്ട് ചെയ്യുന്നത്. പിടിക്കപ്പെടുമെന്ന് വ്യക്തമായിട്ടും ഇവർ രക്ഷപ്പെടാൻ ശ്രമം നടത്തിയില്ലെന്നും കുക്കുമായി സംസാരിക്കണമെന്ന് സെക്യൂരിറ്റി ജീവനക്കാരോട് പറയുകയുമായിരുന്നു. സംശയം തോന്നിയ പോലീസ് നടത്തിയ പരിശോധനയിൽ യുവതിയുടെ കാറിൽ നിന്ന് ആയുധങ്ങളൊന്നും കണ്ടെത്തിയില്ല.

കുക്കിൻ്റെ പേരിൽ വിവിധ സ്ഥലങ്ങളിലായി തട്ടിപ്പ് നടത്താൻ യുവതി ശ്രമം നടത്തിയതായി കമ്പനി കോടതിയിൽ പറഞ്ഞു. കാലിഫോർണിയ, ന്യൂയോർക്ക്, വിർജീനിയ എന്നിവിടങ്ങൾ കേന്ദ്രീകരിച്ചാണ് തട്ടിപ്പിന് ശ്രമം നടന്നതെന്നാണ് റിപ്പോർട്ട്. കേസിൻ്റെ പ്രാധാന്യം കണക്കിലെടുത്ത് യുവതിയെക്കുറിച്ചുള്ള കൂടുതൽ വിവരങ്ങൾ പുറത്തുവിടാൻ അധികതർ തയ്യാറായിട്ടില്ല. ഈ മാസമാദ്യം കുക്കിനെതിരെ ട്വിറ്റർ അക്കൗണ്ടിലൂടെ യുവതി ഭീഷണി സന്ദേശം പങ്കുവച്ചിരുന്നു.

LEAVE A REPLY

Please enter your comment!
Please enter your name here

Most Popular

Recent Comments