THE NEWS PLUS PORTAL FOR THE DISCERNING INDIANS OVER THE GLOBE

Friday, January 28, 2022

THE NEWS PLUS PORTAL FOR THE DISCERNING INDIANS OVER THE GLOBE

Home Breaking news ഗ്രൂപ്പുകളിക്കവസാനം ഗ്രൂപ്പില്ലാകളികൾക്കും…ജെയിംസ് കൂടൽ എഴുതുന്നു

ഗ്രൂപ്പുകളിക്കവസാനം ഗ്രൂപ്പില്ലാകളികൾക്കും…ജെയിംസ് കൂടൽ എഴുതുന്നു

കോൺഗ്രസിലെ ‘ഗ്രൂപ്പുകളി’ എന്നത് ഒരു ‘കളി’യാണെന്നും അതിൽ ജയിച്ചാലും തോറ്റാലും ‘കളി’ അങ്ങനെ നിർത്താനാകില്ലെന്നും ആർക്കാണ് അറിയാത്തത്. ‘കളി’ നിൽക്കണമെങ്കിൽ വീതംവച്ച് കിട്ടാനുള്ള സ്ഥാനമാനങ്ങളും അവസാനിക്കണം. അതുവരെ ‘ഷോ മസ്റ്റ് ഗോ ഓൺ…’
പുതിയ ഡിസിസി പ്രസിഡന്റുമാർ മിക്കയിടത്തും സ്ഥാനമേറ്റുകഴിഞ്ഞു. കഴിഞ്ഞതു കഴിഞ്ഞു, പിന്നെയെന്തിനാണ് ഇപ്പോൾ പ്രസ്താവനായുദ്ധങ്ങളും പടലപിണക്കങ്ങളും എന്നു ചോദിച്ചാൽ സംഘടനാ തലത്തിൽ ഇനിയും എത്രയോ ഭാരവാഹികളെ തീരുമാനിക്കാനിരിക്കുന്നു എന്നാണ് ഉത്തരം.
സംസ്ഥാനത്തെ ഗ്രൂപ്പുകളെ കണക്കിലെടുക്കാതെയാണ് ഹൈക്കമാന്റ് ഡിസിസി പ്രസിഡന്റുമാരെ തീരുമാനിച്ചത് എന്നു പൊതുവെ തോന്നുമെങ്കിലും അത്രവേഗത്തിലൊന്നും ‘പിടിവിടുന്നവരല്ല’ നേതാക്കൾ. ഹൈക്കമാന്റ് നടപടി കൊണ്ടുണ്ടായ ഒരു ഗുണം, ഇപ്പോൾ ആരാണ് ഏതു ഗ്രൂപ്പിലാണെന്ന് പറയാൻ വയ്യാത്തവിധം ഒന്നു കലങ്ങിമറഞ്ഞു എന്നതാണ്. അഥവാ ഓരോരുത്തരും ഓരോ ഗ്രൂപ്പായോ എന്നു തോന്നിപ്പോകും. കെ.സുധാകരൻ കെ.പി. സി.സി അദ്ധ്യക്ഷ സ്ഥാനം ഏറ്റെടുത്തതോടെ പല നേതാക്കളും സുധാകരപക്ഷത്തേക്ക് ചാഞ്ഞിട്ടുമുണ്ട്. കലങ്ങിയതല്ലേ, ഇനി കലങ്ങിത്തന്നെ തെളിയണം.
പാർട്ടിയിൽ പുതുതായി രൂപംകൊണ്ട കെ. സുധാകരൻ വി.ഡി. സതീശൻ, കെ.സി. വേണുഗോപാൽ അച്ചുതണ്ടിനെതിരായ സംയുക്തപോരാട്ടത്തിനാണ് ഉമ്മൻ ചാണ്ടിയുടെ തട്ടകമായ കോട്ടയത്ത് തുടക്കംകുറിച്ചത്. കോട്ടയം ഡി.സി.സി. പ്രസിഡന്റായി നാട്ടകം സുരേഷ് ചുമതലയേൽക്കുന്ന ചടങ്ങിലാണ് എ, ഐ ഗ്രൂപ്പുകൾ വെടിപൊട്ടിച്ചത്.

കഴിഞ്ഞദിവസം കണ്ണൂർ ഡി.സി.സി. ആസ്ഥാനമന്ദിരോദ്ഘാടനച്ചടങ്ങിൽ ഉമ്മൻ ചാണ്ടിയും രമേശും ഒഴികെയുള്ള പ്രമുഖനേതാക്കൾ പങ്കെടുത്ത് കെ. സുധാകരന്റെ നേതൃത്വത്തിനു പിന്തുണ പ്രഖ്യാപിച്ചിരുന്നു. അതിനുള്ള മറുപടികൂടിയായി കോട്ടയത്തു നടന്ന ചടങ്ങ്. സ്ഥാനാരോഹണച്ചടങ്ങ് ഉദ്ഘാടനം ചെയ്ത രമേശ് ചെന്നിത്തല രൂക്ഷമായ ഭാഷയിലാണ് ഔദ്യോഗികനേതൃത്വത്തെ വിമർശിച്ചത്. കോൺഗ്രസിൽ പ്രശ്‌നങ്ങളില്ലെന്നു പറഞ്ഞ് ആരും കണ്ണടയ്‌ക്കേണ്ടന്നും അധികാരം കിട്ടിയാൽ ധാർഷ്ട്യത്തിന്റെ ഭാഷ ഉപയോഗിക്കരുതെന്നും രമേശ് മുന്നറിയിപ്പ് നൽകി. ഔദ്യോഗികപക്ഷത്തിനു വേണ്ടി ശക്തമായി വാദിക്കുന്ന കെ. മുരളീധരനെതിരേയും രമേശ് ഒളിയമ്പെയ്തു. അച്ചടക്കത്തെപ്പറ്റി പറയുന്നവരുടെ പൂർവകാലം നോക്കിയാൽ ആരൊക്കെ കോൺഗ്രസിൽ കാണുമെന്ന് ആലോചിക്കണം. കെ. കരുണാകരനും മുരളീധരനും വിട്ടുപോയപ്പോൾ പ്രതിസന്ധിയിലായ പാർട്ടിയെ താനും ഉമ്മൻ ചാണ്ടിയും ചേർന്നാണു തിരിച്ചുകൊണ്ടുവന്നതെന്നു ചൂണ്ടിക്കാട്ടിയ രമേശ്, അന്നത്തെ നേട്ടങ്ങൾ എണ്ണിപ്പറഞ്ഞു.
ഉമ്മൻ ചാണ്ടി ചടങ്ങിൽ പങ്കെടുത്തില്ലെങ്കിലും അദ്ദേഹത്തിന്റെ നിലപാട് എ ഗ്രൂപ്പ് നേതാവ് കെ.സി. ജോസഫ് വ്യക്തമാക്കി. ഉമ്മൻ ചാണ്ടിയുടെ നേതൃത്വത്തിനു കീഴിൽ ഉറച്ചുനിൽക്കുമെന്നും അദ്ദേഹത്തെ എഴുതിത്തള്ളാൻ ആരും വളർന്നിട്ടില്ലെന്നും ജോസഫ് പറഞ്ഞു. നിയമസഭാ തെരഞ്ഞെടുപ്പ് പരാജയത്തിന്റെ ഉത്തരവാദിത്വം രമേശിന്റെ തലയിൽ കെട്ടിവയ്ക്കാനുള്ള ശ്രമം വിലപ്പോകില്ലെന്നും ജോസഫ് പറഞ്ഞത് എഐ സംയുക്തപോരാട്ടത്തിന്റെ കാഹളമായി.
എല്ലാവരും ഒന്നിച്ചുപോകണമെന്ന തിരുവഞ്ചൂർ രാധാകൃഷ്ണന്റെ നിലപാട് ശ്രദ്ധേയമായി. തിരുവഞ്ചൂർ എ ഗ്രൂപ്പ് വിട്ടെന്ന പ്രചാരണത്തിനു മറുപടിയായി, താൻ ഉമ്മൻ ചാണ്ടിക്കൊപ്പമാണെന്ന് അദ്ദേഹം പ്രഖ്യാപിക്കുകയും ചെയ്തു.

ഇതിനിടെ, യൂത്ത് കോൺഗ്രസ് സംസ്ഥാന വക്താക്കളായി അർജുൻ രാധാകൃഷ്ണൻ, ആതിര രാജേന്ദ്രൻ, നീതു ഉഷ, പ്രീതി, ഡെന്നി ജോസ് എന്നിവരെ ദേശീയ നേതൃത്വം നിയമിച്ചതിനു പിന്നാലെ നടപടി മരവിപ്പിച്ചിരുന്നു. അർജുൻ രാധാകൃഷ്ണന്റെ നിയമനത്തിൽ എതിർപ്പ് ഉയർന്നതിനെ തുടർന്നാണ് മരവിപ്പിച്ചത്. തിരുവഞ്ചൂർ രാധാകൃഷ്ണന്റെ മകനാണ് അർജുൻ. നിയമനത്തിൽ എഐസിസി ജനറൽ സെക്രട്ടറി കെ.സി. വേണുഗോപാൽ ഇടപെടുന്നുവെന്ന് ആരോപിച്ച കോൺഗ്രസ് ഗ്രൂപ്പുകൾ രംഗത്ത് വന്നിരുന്നു. നിയമനം അറിഞ്ഞില്ലെന്ന സംസ്ഥാന അധ്യക്ഷൻ ഷാഫി പറമ്പിലിൻറെ വാദവും ഒരു വിഭാഗം നിഷേധിച്ചു. ഷാഫി പറമ്പിൽ അറിയാതെ വക്താവിനെ തിരഞ്ഞെടുക്കാനുള്ള അഭിമുഖത്തിൽ പങ്കെടുക്കാൻ കഴിയില്ലെന്നാണ് വാദം.
ഡി.സി. സി, കെ.പി.സി.സി. പുനഃസംഘടനയിൽ വിലപേശൽ ശക്തി വർധിപ്പിക്കാനും എ ഐ സംയുക്തനീക്കം ലക്ഷ്യമിടുന്നു. കെ.ശിവദാസൻ നായരെയും കെ.പി.അനിൽകുമാറിനെയും സസ്‌പെൻഡ് ചെയ്ത നേതൃത്വം ഉമ്മൻ ചാണ്ടിക്കെതിരെ തിരിഞ്ഞ രാജ്‌മോഹൻ ഉണ്ണിത്താനോടു കാട്ടുന്ന അനുനയത്തിലും എതിർപ്പുണ്ട്. തർക്കങ്ങളും പൊട്ടിത്തെറിയും പരിഹരിക്കാൻ, മുതിർന്ന നേതാക്കളായ ഉമ്മൻ ചാണ്ടിയേയും രമേശ് ചെന്നിത്തലയേയും അനുനയിപ്പിക്കാൻ നീക്കവുമായി പ്രതിപക്ഷ നേതാവ് വി.ഡി സതീശൻ സെപ്റ്റംബർ ആറിന് ചേരുന്ന യു.ഡി.എഫ് മുന്നണി യോഗത്തിൽ പങ്കെടുക്കണമെന്ന് ഇരുനേതാക്കളോടും അഭ്യർത്ഥിച്ചിട്ടുണ്ട്. സതീശന്റെ ക്ഷണത്തോട് ഇരുവരും എങ്ങനെ പ്രതികരിക്കുമെന്നത് നിർണായകമാണ്. ഒരു മാസത്തിനകം കെപിസിസി ഭാരവാഹികളെ പ്രഖ്യാപിക്കാനാണു തീരുമാനം. സമാന്തരമായി ഡിസിസി ഭാരവാഹികളെ സംബന്ധിച്ച ചർച്ച ജില്ലകളിൽ ആരംഭിക്കും. അതിനായുള്ള ജില്ലാതല സംവിധാനം സംബന്ധിച്ചും മുതിർന്ന നേതാക്കളുമായി ആശയവിനിമയം നടത്തും.
ആറുമാസത്തിനുള്ളിൽ

കോൺഗ്രസിനുള്ളിൽ അടിമുടി മാറ്റമുണ്ടാകുമെന്നാണ് കെ.പി.സി.സി പ്രസിഡന്റ് കെ.സുധാകരൻ പ്രഖ്യാപിച്ചതിന്റെ സൂചനകളാണ് ഇപ്പോൾ കോൺഗ്രസിൽ കാണുന്നത്. ഗ്രൂപ്പുകളില്ലാത്ത കോൺഗ്രസിനെ പടത്തുയർത്താനും ഐക്യത്തോടെ ഒരുമിച്ചു പോകാനുമുള്ള ശ്രമാണ് സുധാകരൻ നടത്തിക്കൊണ്ടിരിക്കുന്നത്. ഗ്രൂപ്പ് നേതാക്കൻമാർക്ക് ശക്തമായ താക്കീതും നൽകി അവർക്ക് വഴങ്ങില്ലെന്നും സുധാകരൻ പറഞ്ഞു കഴിഞ്ഞു. പാർട്ടി കാര്യത്തിൽ ഇനി അവസാന വാക്ക് കെ.പി.സി.സി അദ്ധ്യക്ഷനായിരിക്കും. കഴിഞ്ഞ 10 വർഷത്തെ കോൺഗ്രസിന്റെ സ്ഥിതിയിൽ മാറ്റം വരുകയാണ്. ഇതാണ് പല നേതാക്കളെയും ചൊടിപ്പിക്കുന്നത്. കെ.പി.സി.സി അദ്ധ്യക്ഷൻ അഭിപ്രായം പറഞ്ഞാൽ നേർ വിപരീതം പറയുന്ന പാർലമെന്ററി നേതാവ്. പൊതു അഭിപ്രായമില്ലാത്ത പാർട്ടി. ആർക്കും എന്തു വിഷയത്തെ പറ്റിയും എന്തും പറയാം. ഇതായിരുന്നു കോൺഗ്രസിലെ സ്ഥിതി. ഈസ്ഥിക്ക് മാറ്റം വരാനും കോൺഗ്രസിലെ എക്കാലത്തേയും ഗ്രൂപ്പുകളി അവസാനിപ്പിക്കാനുമാണ് സുധാകരന്റെ ശ്രമം.

ഡിസിസി പ്രസിഡന്റ് പദവി ലഭിക്കാത്തതിൽ പ്രതിഷേധിച്ച് കോൺഗ്രസ് അംഗത്വം രാജിവച്ചതിന്റെ രണ്ടാം നാൾ മുൻ എംഎൽഎ എ.വി.ഗോപിനാഥ് നിലപാട് മയപ്പെടുത്തി. പ്രവർത്തകരുടെ വികാരം കണക്കിലെടുത്ത് ഒരു രാഷ്ട്രീയ പാർട്ടിയിലേക്കും പോകാൻ ഉദ്ദേശിക്കുന്നില്ലെന്നും ജനങ്ങളുടെ അഭിപ്രായം നേരിട്ടറിഞ്ഞ് തുടർനടപടി സ്വീകരിക്കുമെന്നും അദ്ദേഹം പറഞ്ഞു. പെരിങ്ങോട്ടുകുറിശ്ശിയിലെ പഞ്ചായത്തംഗങ്ങളും കോൺഗ്രസ് മണ്ഡലം ഭാരവാഹികളുമായുള്ള യോഗത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. കോൺഗ്രസ് വിട്ട തീരുമാനം പുനഃപരിശോധിക്കണമെന്നായിരുന്നു യോഗത്തിലെ ആവശ്യം. തൽക്കാലം അതിനു കഴിയില്ലെന്നറിയിച്ച ഗോപിനാഥ്, മറ്റൊരു പാർട്ടിയിലേക്ക് പോകില്ലെന്ന് ഉറപ്പ് നൽകി. ഭരണസമിതിക്കൊപ്പം മുഴുവൻ വാർഡുകളിലും സഞ്ചരിച്ച് ജനങ്ങളുടെ അഭിപ്രായം തേടാനാണ് ഗോപിനാഥിന്റെ തീരുമാനം.

വാൽക്കഷണം
ഇത്തവണ ചാനൽ സംവാദകനായ
ശ്രീജിത്ത് പണിക്കർ ട്രോളിയത്,
സ്ത്രീസുരക്ഷയ്ക്ക് പ്രാധാന്യം നൽകിക്കൊണ്ട് ബസ് സ്റ്റാൻഡുകളിൽ മദ്യക്കടകൾ ആരംഭിക്കാൻ തീരുമാനിച്ച സർക്കാരിന് നൂറു സൊയമ്പൻ അഭിവാദ്യങ്ങൾ!
ക്യൂബളം ട്രാൻസ്‌പോർട്ട് സർവീസ് അനൗൺസ്‌മെന്റ്: ”കുടിയന്മാരുടെ ശ്രദ്ധയ്ക്ക്, തിരുവനന്തപുരത്തു നിന്നും കൊട്ടാരക്കര വഴി മദ്യവിമുക്ത കിനാശ്ശേരിക്കു പോകുന്ന തണ്ണീർ എക്‌സ്പ്രസ് ബസ്സ് കള്ളുഷാപ്പിന്റെ പിന്നിലായി പാർക്ക് ചെയ്തിരിക്കുന്നു. ഈ ബസ്സിന്റെ ഡ്രൈവറെ ഷാപ്പിന്റെ മുന്നിൽ ചാരി വെച്ചിട്ടുണ്ട്. ഷാപ്പിന്റെ മുന്നിൽ നിൽക്കുന്ന കുടിയന്മാർ ഡ്രൈവറെ സീറ്റിലേക്ക് എടുത്തു വെക്കണമെന്ന് അപേക്ഷിക്കുന്നു. പറ്റ് തീർത്ത ശേഷം കണ്ടക്ടർ എത്തിയാലുടൻ സർവീസ് ആരംഭിക്കുന്നതാണ്. മറ്റൊരു അറിയിപ്പ്, കുപ്പി വാങ്ങിയ യാത്രക്കാർക്ക് തൊട്ടടുത്ത കടയിൽ നിന്നും ടച്ചിങ്‌സ് വാങ്ങാനുള്ള സൗകര്യം ഉണ്ടായിരിക്കുന്നതാണ്. സോഡ സ്‌റ്റോക്ക് തീർന്നു. അടുത്ത അനൗൺസ്‌മെന്റ് അടുത്ത പൈന്റിനു ശേഷം. ഒഴിക്കെടാ ഒന്നൂടെ…’

LEAVE A REPLY

Please enter your comment!
Please enter your name here

Most Popular

Recent Comments