THE NEWS PLUS PORTAL FOR THE DISCERNING INDIANS OVER THE GLOBE

Saturday, December 4, 2021

THE NEWS PLUS PORTAL FOR THE DISCERNING INDIANS OVER THE GLOBE

Home Breaking news ഒരു കോടി ഡോസ് വാക്സിൻ വാങ്ങാൻ കേരളം

ഒരു കോടി ഡോസ് വാക്സിൻ വാങ്ങാൻ കേരളം

തിരുവനന്തപുരം: സ്വന്തം നിലയ്ക്ക് ഒരു കോടി ഡോസ് കൊവിഡ് 19 പ്രതിരോധ വാക്സിൻ വാങ്ങാനുള്ള തീരുമാനത്തിൽ സംസ്ഥാന സര്‍ക്കാര്‍. കൊവിഡ് വാക്സിന് നിര്‍മാതാക്കള്‍ നിശ്ചയിച്ച വില സംബന്ധിച്ച പരാതി നിലനിൽക്കേയാണ് വാക്സിൻ വാങ്ങാനുള്ള നീക്കവുമായി സംസ്ഥാന സര്‍ക്കാര്‍ മുന്നോട്ടു പോകുന്നത്. ഇതു സംബന്ധിച്ച് മന്ത്രിസഭായോഗത്തിൽ തീരുമാനമെടുത്തു. മെയ് മാസത്തിൽ മാത്രം പത്ത് ലക്ഷം ഡോസ് വാക്സിൻ എത്തിക്കും.

70 ലക്ഷം ഡോസ് കൊവിഷീൽഡ് വാക്സിനും 30 ലക്ഷം ഡോസ് കൊവാക്സിനും വാങ്ങാനാണ് മന്ത്രിസഭാ തീരുമാനം. ഇതിൽ പത്ത് ലക്ഷം ഡോസ് കൊവാക്സിനാണ് ആദ്യഘട്ടത്തിൽ എത്തുകയെന്ന് റിപ്പോര്‍ട്ടുകൾ പറയുന്നു. വാക്സിൻ വാങ്ങാനായി ഉദ്യോഗസ്ഥ തലത്തിൽ ചര്‍ച്ച തുടരുകയാണെന്ന് മുഖ്യമന്ത്രി പിണറായി വിജയൻ കഴിഞ്ഞ ദിവസം വാര്‍ത്താ സമ്മേളനത്തിൽ വ്യക്തമാക്കിയിരുന്നു.

നിലവിൽ കൊവിഷീൽഡ് വാക്സിൻ 400 രൂപയ്ക്ക് സംസ്ഥാനങ്ങള്‍ക്കും 600 രൂപയ്ക്ക് സ്വകാര്യ ആശുപത്രികള്‍ക്കും വിൽക്കുമെന്നാണ് നിര്‍മാതാക്കളായ സിറം ഇൻസ്റ്റിറ്റ്യൂട്ട് ഓഫ് ഇന്ത്യ പ്രഖ്യാപിച്ചിരിക്കുന്നത്. കൊവാക്സിന് സംസ്ഥാനങ്ങള്‍ 600 രൂപയും സ്വകാര്യ ആശുപത്രികള്‍ 1200 രൂപയുമാണ് നല്‍കേണ്ടത്. ഈ രണ്ട് വാക്സിനുകളും ഒരു ഡോസിന് 150 രൂപ മാത്രം നല്‍കിയാണ് കേന്ദ്രസര്‍ക്കാര്‍ വാങ്ങുന്നത്. പല വിലയ്ക്ക് വാക്സിൻ വിൽക്കുന്ന പുതിയ കേന്ദ്രനയത്തിനെതിരെ സംസ്ഥാനങ്ങള്‍ രംഗത്തെത്തിയ സാഹചര്യത്തിൽ തീരുമാനം പുനഃപരിശോധിക്കാൻ സംസ്ഥാനങ്ങളോട് ആവശ്യപ്പെട്ടിട്ടുണ്ട്. ഈ സാഹചര്യത്തിലും അടിയന്തര സാഹചര്യം പരിഗണിച്ച് സംസ്ഥാനങ്ങള്‍ വാക്സിൻ വാങ്ങാനുള്ള നടപടികളുമായി മുന്നോട്ടു പോകുകയാണ്.

സംസ്ഥാനത്ത് എല്ലാവര്‍ക്കും കൊവിഡ് 19 വാക്സിൻ സൗജന്യമായി ലഭ്യമാക്കുമെന്ന് മുഖ്യമന്ത്രി നേരത്തെ പ്രഖ്യാപിച്ചിരുന്നു. അതേസമയം, വാക്സിനേഷൻ ചെലവ് സംസ്ഥാനങ്ങള്‍ ഏറ്റെടുക്കണമെന്ന കേന്ദ്രനയത്തിനെതിരെ സംസ്ഥാനം ശക്തമായ പ്രതിഷേധം അറിയിച്ചിട്ടുണ്ട്. ഈ സാഹചര്യത്തിൽ വാക്സിൻ വാങ്ങാനായി മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് ധനസമാഹരണവും നടക്കുന്നുണ്ട്.

LEAVE A REPLY

Please enter your comment!
Please enter your name here

Most Popular

Recent Comments