THE NEWS PLUS PORTAL FOR THE DISCERNING INDIANS OVER THE GLOBE

Sunday, November 28, 2021

THE NEWS PLUS PORTAL FOR THE DISCERNING INDIANS OVER THE GLOBE

Home Gulf കൊറോണയെ തടയാന്‍ ബബ്ള്‍ സിസ്റ്റവുമായി ഖത്തര്‍

കൊറോണയെ തടയാന്‍ ബബ്ള്‍ സിസ്റ്റവുമായി ഖത്തര്‍

ദോഹ: രാജ്യത്ത് കൊവിഡ് വ്യാപനം അനുദിനം വര്‍ധിച്ചുകൊണ്ടിരിക്കുന്ന സാഹചര്യത്തില്‍ വ്യാപനത്തിന്റെ തോത് കുറയ്ക്കാന്‍ പുതിയ പ്രതിരോധ മാര്‍ഗവുമായി ഖത്തര്‍. ആളുകള്‍ വ്യാപകമായി സമ്പര്‍ക്കത്തിലേര്‍പ്പെടുന്നത് തടയാന്‍ ചെറു ഗ്രൂപ്പുകള്‍ പരസ്പരം ഇടകലരാതെ നോക്കുന്ന രീതിയാണ് ഖത്തര്‍ ആരോഗ്യമന്ത്രാലയം പരീക്ഷിക്കുന്നത്. ഉദാഹരണമായി എപ്പോഴും പരസ്പരം കണ്ടുമുട്ടുന്ന ഒരു വീട്ടിലെ അംഗങ്ങളോ ഒരു ടീമിലെ കളിക്കാരോ ഒരു സ്ഥാപനത്തിലെ ജീവനക്കാരോ മറ്റുള്ളവരുമായി ഇടപഴകാനുള്ള എല്ലാ സാധ്യതയും ഒഴിവാക്കിക്കൊണ്ടുള്ള ബബ്ള്‍ സമ്പ്രദായമാണിത്.

ഇതുവഴി കൊവിഡ് വ്യാപനത്തിന്റെ തോത് ഫലപ്രദമായി നിയന്ത്രിക്കാന്‍ സാധിക്കുമെന്നാണ് പ്രതീക്ഷയെന്ന് ഖത്തര്‍ ആരോഗ്യമന്ത്രാലയത്തിനു കീഴിലെ നാഷനല്‍ ഹെല്‍ത്ത് സ്ട്രാറ്റജിക് ഗ്രൂപ്പ് തലവന്‍ ഡോ. അബ്ദുല്ലത്തീഫ് അല്‍ ഖാല്‍ പറഞ്ഞു. കുടുംബങ്ങള്‍ക്കു പുറമെ, സ്ഥിരമായി കണ്ടുമുട്ടാറുള്ള സുഹൃത്തുക്കള്‍ മറ്റുള്ളവരുമായുള്ള സമ്പര്‍ക്കത്തിലേര്‍പ്പെടുന്നത് പരമാവധി കുറയ്ക്കാനും ഇതിലൂടെ സാധിക്കും. വാക്‌സിനെടുത്തവരാണെങ്കില്‍ പോലും വീടുകളിലുള്ളവര്‍ അടിയന്തര സാഹചര്യങ്ങളില്‍ മാത്രമേ പുറത്തിറങ്ങാവൂ.

പുറത്തിറങ്ങുമ്പോള്‍ മാസ്‌ക് ധാരണം, സാമൂഹ്യ അകലം പാലിക്കല്‍, കൈകള്‍ അണുവിമുക്തമാക്കള്‍ തുടങ്ങിയ കൊവിഡ് പെരുമാറ്റച്ചട്ടങ്ങള്‍ പൂര്‍ണമായി പാലിക്കണം. ബബ്ള്‍ സമ്പ്രദായം നടപ്പിലാക്കാന്‍ അല്‍പം പ്രയാസമാണെങ്കിലും അതുണ്ടാക്കുന്ന ഫലം വലുതായിരിക്കുമെന്നും അദ്ദേഹം പറഞ്ഞു.

രാജ്യത്ത് കൊവിഡിന്റെ ജനിതകമാറ്റം സംഭവിച്ച വകേഭേദം വ്യാപകമായി റിപ്പോര്‍ട്ട് ചെയ്യപ്പെട്ട പശ്ചാത്തലത്തില്‍ നിയന്ത്രണങ്ങള്‍ കര്‍ക്കശമാക്കാന്‍ കഴിഞ്ഞ ദിവസം ആരോഗ്യമന്ത്രാലയം തീരുമാനിച്ചിരുന്നു. ഈ നിയന്ത്രണങ്ങള്‍ ഇനിയൊരു അറിയിപ്പുണ്ടാവുന്നത് വരെ തുടരുമെന്നും ഡോ. അബ്ദുല്ലത്തീഫ് അല്‍ ഖാല്‍ അറിയിച്ചു.

LEAVE A REPLY

Please enter your comment!
Please enter your name here

Most Popular

Recent Comments