ന്യൂഡൽഹി: രാജ്യത്തെ ഐ.ഐ.ടികള്‍, എന്‍.ഐ.ടികള്‍ തുടങ്ങിയ സ്ഥാപനങ്ങളിലേക്കുള്ള എഞ്ചിനീയറിങ് പ്രവേശനത്തിന് പന്ത്രണ്ടാം ക്ലാസില്‍ 75 ശതമാനം മാര്‍ക്ക് വേണമെന്ന നിബന്ധനയില്ല. കേന്ദ്ര വിദ്യാഭ്യാസ മന്ത്രി രമേശ് പൊഖ്രിയാലാണ് ഇക്കാര്യം അറിയിച്ചത്.
പന്ത്രണ്ടാം ക്ലാസ് പരീക്ഷയില്‍ ജയിക്കുന്നവര്‍ക്ക് ഐ.ഐ.ടി അടക്കമുള്ള സ്ഥാപനങ്ങളില്‍ പ്രവേശ പരീക്ഷയുടെ അടിസ്ഥാനത്തില്‍ പ്രവേശനം ലഭിക്കും. കഴിഞ്ഞ വര്‍ഷം വരെ പന്ത്രണ്ടാം ക്ലാസില്‍ കുറഞ്ഞത് 75 ശതമാനം മാര്‍ക്ക് ലഭിക്കുകയോ ദേശീയ 20 റാങ്കിനുള്ളില്‍ വരുന്നവര്‍ക്കോ ആയിരുന്നു എന്‍.ഐ.ടികളില്‍ പ്രവേശനം നേടാന്‍ യോഗ്യതയുണ്ടായിരുന്നത്. ഇതിനാണ് ഇപ്പോള്‍ ഇളവ് വരുത്തിയിരിക്കുന്നത്. രാജ്യത്തെ എന്‍.ഐ.ടി, ഐ.ഐ.ടി, സി.എഫ്.ടി.ഐ എന്നീവിടങ്ങളില്‍ ബി.ഇ, ബി.ടെക്, ബി.ആര്‍ക്ക്, ബി.പ്ലാനിംഗ് എന്നീ കോഴ്‌സുകള്‍ പഠിക്കണമെങ്കില്‍ ഈ പന്ത്രണ്ടാം ക്ലാസില്‍ 75 ശതമാനത്തില്‍ കുറയാത്ത മാര്‍ക്ക് നേടിയിരിക്കണമായിരുന്നു.
ജോയിന്റ് എന്‍ട്രന്‍സ് എക്‌സാമിനേഷന്റെ (ജെ.ഇ.ഇ മെയിന്‍) അടിസ്ഥാനത്തില്‍ വിദ്യാര്‍ത്ഥികളെ പ്രവേശിപ്പിക്കും. 31 എന്‍.ഐ.ടികള്‍, 25 ഐ.ഐ.ടികള്‍, 28 ഗവണ്‍മെന്റ് ഫണ്ടഡ് ടെക്‌നിക്കല്‍ ഇന്‍സ്റ്റിറ്റ്യൂട്ടുകള്‍ എന്നിവിടങ്ങളിലേക്ക് ജെ.ഇ.ഇ മെയിനില്‍ ലഭിക്കുന്ന സ്‌കോറിന്റെ അടിസ്ഥാനത്തില്‍ വിദ്യാര്‍ത്ഥികള്‍ക്ക് പ്രവേശനം നല്‍കും. പന്ത്രണ്ടാം ക്ലാസ് പരീക്ഷയില്‍ ജയിച്ചാല്‍ മതിയാകും.
ഈ വര്‍ഷം ജെ.ഇ.ഇ മെയിന്‍ പരീക്ഷ 4 തവണയായി നടക്കും. ആദ്യ സെഷന്‍ ഫെബ്രുവരിയിലാണ്. മാര്‍ച്ച്, ഏപ്രില്‍, മെയ് മാസങ്ങളിലായി ബാക്കിയുള്ള മൂന്ന് സെഷനുകളും നടക്കും. ഫെബ്രുവരി സെഷനിലേക്കുള്ള രജിസ്‌ട്രേഷന്‍ നടപടികള്‍ പുരോഗമിക്കുകയാണ്. ഇതുവരെ രജിസ്റ്റര്‍ ചെയ്യാത്തവര്‍ ഉടന്‍ ചെയ്യുക. ജനുവരി 23 ആണ് അവസാന തീയതി. അപേക്ഷിക്കാനായി jeemain.nta.nic.in എന്ന വെബ്‌സൈറ്റ് സന്ദര്‍ശിക്കാം.
ഐ.ഐ.ടി ജെ.ഇ.ഇ അഡ്വാന്‍സ്ഡ് പരീക്ഷ നടത്തുന്ന ജോയിന്റ് അഡ്മിഷന്‍ ബോര്‍ഡ് നേരത്തെ തന്നെ പന്ത്രണ്ടാം ക്ലാസിലെ 75 ശതമാനം മാര്‍ക്കെന്ന മാനദണ്ഡം എടുത്തുകളഞ്ഞിരുന്നു. രാജ്യത്തെ 23 ഐ.ഐ.ടികളിലേക്കുള്ള എഞ്ചിനീയറിങ്, സയന്‍സ് ആര്‍ക്കിടെക്ച്ചര്‍ ബിരുദ കോഴ്‌സുകളുടെ പ്രവേശനത്തിനനായാണ് ഐ.ഐ.ടി ജെ.ഇ.ഇ അഡ്വാന്‍സ്ഡ് പരീക്ഷ നടത്തുന്നത്. അതേസമയം ജെ.ഇ.ഇ അഡ്വാന്‍സ്ഡ് പരീക്ഷയ്ക്കായി അപേക്ഷിക്കണമെങ്കില്‍ ജെ.ഇ.ഇ മെയിന്‍ പരീക്ഷയില്‍ യോഗ്യത നേടിയിരിക്കണം.
