തിരുവനന്തപുരം: സെക്രട്ടറിയേറ്റിനു മുന്നില്‍ എല്‍ജിഎസ് ഉദ്യോഗാര്‍ഥികള്‍ നടത്തുവന്ന സമരം അവസാനിപ്പിച്ചു. ഇന്ന് നടന്ന ചര്‍ച്ചയില്‍ ഉദ്യോഗാര്‍ഥികള്‍ മുന്നോട്ടുവെച്ച ആവശ്യങ്ങള്‍ സര്‍ക്കാര്‍ അംഗീകരിച്ചതോടെയാണ് സമരം അവസാനിപ്പിച്ചത്. മുഖ്യമന്ത്രിയുടെ നിര്‍ദേശപ്രകാരം നിയമമന്ത്രി എ.കെ ബാലനാണ് ഉദ്യോഗാര്‍ഥികളുമായി ചര്‍ച്ച നടത്തിയത്.സര്‍ക്കാരിന്റെ ഭാഗത്തുനിന്ന് അനുകൂല സമീപനമാണ് ഉണ്ടായതെന്ന് ഉദ്യോഗാര്‍ഥികള്‍ പറഞ്ഞു.
വാച്ച്മാന്മാരുടെ ജോലി സമയം എട്ട് മണിക്കൂറായി നിജപ്പെടുത്തും. നൈറ്റ് വാച്ച്മാന്‍ ഒഴിവുകളിലേക്ക് നിലവിലെ റാങ്ക് ലിസ്റ്റില്‍ നിന്ന് നിയമനം നടത്തുന്നതിനുള്ള ശുപാര്‍ശ നിയമപ്രകാരം നടത്തും. ഒഴിവുകള്‍ കൃത്യമായി റിപ്പോര്‍ട്ട് ചെയ്യാനും നടപടിയുണ്ടാവും. തെരഞ്ഞെടുപ്പ് കമ്മീഷനുമായി ചര്‍ച്ച ചെയ്ത് അനുമതി ലഭിക്കുന്ന മുറയ്ക്ക് ഇക്കാര്യങ്ങളില്‍ നടപടിയുണ്ടാവുമെന്നും മന്ത്രി എ.കെ ബാലന്‍ ഉറപ്പുനല്‍കി. മിനിറ്റ്‌സ് വന്നാലുടന്‍ സമരം നിര്‍ത്തി മടങ്ങും. മന്ത്രിയുടെ വാക്ക് വിശ്വസിക്കുന്നുവെന്നും ഉദ്യോഗാര്‍ഥികള്‍ മാധ്യമങ്ങളോട് പറഞ്ഞു.
