ഇനി പാസ്‌പോർട്ട് നൽകും മുൻപ് സമൂഹമാദ്ധ്യമ അക്കൗണ്ടും പരിശോധിക്കുമെന്ന് പൊലീസ്
ഡെഹ്‌റാഡൂൺ: പാസ്‌പോർട്ടിനോ ആയുധ ലൈസൻസിനോ വേണ്ടി അപേക്ഷിക്കുമ്പോൾ, അപേക്ഷകന്റെ സമൂഹമാദ്ധ്യമങ്ങളിലെ സ്വഭാവം കൂടി അറിഞ്ഞ ശേഷമേ പൊലീസ് പാസ്‌പോർട്ടും ആയുധ ലൈസൻസും ഇനി അനുവദിക്കുകയുള്ളൂ. ഉത്തരാഖണ്ഡ് ഡിജിപി അശോക് കുമാറാണ് ഈ വിവരം അറിയിച്ചത്.സമൂഹമാദ്ധ്യമങ്ങൾ ഉപയോഗിച്ചുള‌ള ദുരുപയോഗം അവസാനിപ്പിക്കാനാണ് ഈ നടപടിയെന്നാണ് ഡിജിപി അശോക് കുമാർ അറിയിച്ചത്.
“ഇതുവരെ, ഏതെങ്കിലും വ്യക്തി ഏതെങ്കിലും ദേശീയ വിരുദ്ധ പോസ്റ്റുകൾ സോഷ്യൽ മീഡിയയിൽ ഇടുകയാണെങ്കിൽ, പോലീസ് ആദ്യം അദ്ദേഹത്തിന് കൗൺസിലിംഗ് നടത്തുകയും ഭാവിയിൽ ഇത് ആവർത്തിക്കരുതെന്ന് ആവശ്യപ്പെടുകയും ചെയ്യും. വളരെ ഗുരുതരമായ കേസാണെങ്കിൽ മാത്രമേ കേസ് രജിസ്റ്റർ ചെയ്യപ്പെട്ടിട്ടുള്ളൂ”. അശോക് കുമാർ പറഞ്ഞു. ഇനി മുതൽ, അത്തരം രാജ്യവിരുദ്ധ പോസ്റ്റുകൾ ഇടുന്നത് പതിവാണോയെന്ന് പരിശോധിക്കാൻ പോലീസ് പ്രതിയുടെ സോഷ്യൽ മീഡിയ അക്കൗണ്ടുകൾ പരിശോധിക്കും. അത് കണ്ടെത്തിയാൽ, പാസ്‌പോർട്ടിനും ആയുധ ലൈസൻസിനും അപേക്ഷിക്കുമ്പോൾ ആവശ്യമായ പോലീസ് വെരിഫിക്കേഷൻ പോലീസ് നൽകില്ല .
സംസ്ഥാനത്ത് സോഷ്യൽ മീഡിയയിൽ ദേശവിരുദ്ധ പോസ്റ്റുകൾ ഇടുന്നവരുടെ എണ്ണത്തിൽ വർധനവുണ്ടായതിനാലാണ് ഇത്തരമൊരു തീരുമാനം. ക്രമസമാധാനത്തിന് വ്യക്തമായ ഭീഷണിയായതിനാൽ ഇത്തരം പോസ്റ്റുകളെയും ആളുകളെയും കണ്ടെത്താൻ സോഷ്യൽ മീഡിയ മോണിറ്ററിംഗ് ടീം കർശന ജാഗ്രത പാലിക്കുന്നുണ്ടെന്നും ഉദ്യോഗസ്ഥർ പറഞ്ഞു.
