THE NEWS PLUS PORTAL FOR THE DISCERNING INDIANS OVER THE GLOBE

Thursday, September 23, 2021

THE NEWS PLUS PORTAL FOR THE DISCERNING INDIANS OVER THE GLOBE

Home Breaking news സൗദിയിൽ വാക്സിന്‍ എടുക്കാത്തവര്‍ക്ക് ജോലി ചെയ്യാനാവില്ല

സൗദിയിൽ വാക്സിന്‍ എടുക്കാത്തവര്‍ക്ക് ജോലി ചെയ്യാനാവില്ല

റിയാദ്: രാജ്യത്ത് കൊവിഡ് വാക്സിന്‍ ക്യാംപയിന്‍ കൂടുതല്‍ ശക്തിപ്പെടുത്തി സൗദി അധികൃതര്‍. രാജ്യത്തെ എല്ലാ ജീവനക്കാര്‍ക്കും ജോലി സ്ഥലത്തെത്തണമെങ്കില്‍ വാക്സിനേഷന്‍ നിര്‍ബന്ധമാണെന്ന വ്യവസ്ഥയാണ് അധികൃതര്‍ പുതുതായി മുന്നോട്ടുവച്ചിരിക്കുന്നത്. വാക്സിനെടുക്കാത്തവര്‍ക്ക് ജോലി സ്ഥലത്തെത്തി പണിയെടുക്കാനാവില്ലെന്ന് മനുഷ്യവിഭവ- സാമൂഹിക വികസന മന്ത്രാലയത്തെ ഉദ്ധരിച്ച് ഔദ്യോഗിക ടെലിവിഷന്‍ ചാനലായ അല്‍ ഇഖ്ബാരിയ്യ റിപ്പോര്‍ട്ട് ചെയ്തു. രാജ്യത്തെ സര്‍ക്കാര്‍, സ്വകാര്യ, സന്നദ്ധ മേഖലകള്‍ക്കെല്ലാം ഈ നിബന്ധന ബാധകമാണ്. രാജ്യത്ത് കൊവിഡ് വ്യാപനം പ്രതിരോധിക്കുന്നതിന്റെ ഭാഗമായാണ് നടപടി.

എന്നാല്‍ പുതിയ തീരുമാനം എന്ന് മുതലാണ് നടപ്പില്‍ വരികയെന്നോ രണ്ടു ഡോസ് വാക്സിന്‍ സ്വീകരിച്ചവര്‍ക്കു മാത്രമാണോ അനുമതി തുടങ്ങിയ കാര്യങ്ങളെ കുറിച്ച് അറിയിപ്പ് വരാനിരിക്കുന്നതേയുള്ളൂ. അതിനു മുമ്പ് തന്നെ എല്ലാ തൊഴിലുടമകളും സ്ഥാപനങ്ങളും തങ്ങളുടെ ജീവനക്കാര്‍ക്ക് വാക്സിന്‍ ലഭിച്ചുവെന്ന് ഉറപ്പുവരുത്തുന്നതിനുള്ള നടപടികള്‍ സ്വീകരിക്കണമെന്നും മന്ത്രാലയം ആവശ്യപ്പെട്ടു. തീയതി തീരുമാനിച്ചു കഴിഞ്ഞാല്‍ അതിനു ശേഷം വാക്സിനെടുക്കാത്തവര്‍ക്ക് ജോലി സ്ഥലത്ത് ഹാജരാവാന്‍ കഴിയില്ലെന്നും അധികൃതര്‍ വ്യക്തമാക്കി. ജീവനക്കാരുടെയും ജനങ്ങളുടെയും ആരോഗ്യ സുരക്ഷ ഉറപ്പുവരുത്തുന്നതിന്റെ ഭാഗമായി എല്ലാ ആരോഗ്യ പെരുമാറ്റച്ചട്ടങ്ങളും കര്‍ശനമായി പാലിക്കാനും മന്ത്രാലയം ബന്ധപ്പെട്ടവര്‍ക്ക് നിര്‍ദ്ദേശം നല്‍കി.

അതിനിടെ, രാജ്യത്ത് ഇതിനകം ഒരു കോടിയിലേറെ കൊവിഡ് വാക്സിന്‍ ഡോസുകള്‍ വിതരണം ചെയ്തു കഴിഞ്ഞതായി ആരോഗ്യമന്ത്രാലയം അറിയിച്ചു. ജനസംഖ്യയുടെ 29 ശതമാനത്തിലേറെ പേര്‍ക്ക് ഇതിനകം വാക്സിന്‍ ലഭിച്ചു കഴിഞ്ഞു. രാജ്യത്തെ 587 വാക്സിനേഷന്‍ കേന്ദ്രങ്ങളിലൂടെ പ്രതിദിനം ഒന്നര ലക്ഷത്തോളം പേര്‍ക്കാണ് വാക്സിന്‍ നല്‍കിവരുന്നതെന്നും മന്ത്രാലയം വ്യക്തമാക്കി.

LEAVE A REPLY

Please enter your comment!
Please enter your name here

Most Popular

Recent Comments