നാമം ഓണം ഞായറാഴ്ച

(ജോർജ് നടവയൽ)

ന്യൂജേഴ്‌സി: നാമം ഓണം (NAMAM ONAM) ഞായറാഴ്ച. . അമേരിക്കൻ മലയാള സ്നേഹസംഗമത്തിന്റെ തറവാട്ടുമുറ്റമെന്ന് കീർത്തിപ്പെടുന്ന നാമം, ഗൃഹാതുരചാരുതയോടെ, നാമം ഓണം NAMAM ONAM എന്ന പേരിൽ, തിരുവോണമെന്ന അനുഭൂതിവിശേഷത്തെ, സമഭാവനയുടെ പൂപ്പടകൊണ്ട്, ലോകമെമ്പാടുമുള്ള മലയാളമക്കൾ, വരവേൽക്കുന്ന പൊന്നിൻ ചിങ്ങ മാസത്തിൽ തന്നെ (ചിങ്ങം 7, ആഗസ്റ്റ് 23), കൊണ്ടാടുന്നു. “പരസ്പര ബഹുമാനത്തിൻ്റെ മൂല്യങ്ങളെ ആദരിക്കാനും ഐക്യത്തിന്റെ ബന്ധങ്ങൾ പുതുക്കാനും വേണ്ടിയുള്ള ഓണം” എന്നാണ് ഇത്തവണത്തെ നാമം ഓണാഘോഷത്തിൻ്റെ പരിവേഷ ഭംഗി.

ആഗസ്റ്റ് 23 ഞായറാഴ്ച രാവിലെ 10 മുതൽ ഉച്ചകഴിഞ്ഞ് 3 വരെ വെറ്ററൻസ് പാർക്ക് – സ്പ്രേ ഗ്രൗണ്ട്, 61 അവന്യൂ കെ, മൺറോ ടൗൺഷിപ്പ്, ന്യൂജേഴ്‌സി 08831 ൽ നടക്കുന്ന ഈ വർഷത്തെ ആഘോഷങ്ങൾ, തിരുവാതിരയുടെ കാലാതീതമായ ചാരുത, ഓണം സദ്യയുടെ വിലപ്പെട്ട സമൃദ്ധി, പുലികളിയുടെ ഊർജ്ജസ്വലമായ കലാവൈഭവം എന്നിവയെ ചേരുമ്പടി ചേർത്തവതരിപ്പിക്കുന്നു
എന്ന് നാമം ഫൗണ്ടർ മാധവൻ ബി നായർ, പ്രസിഡൻ്റ് പ്രദീപ് മേനോൻ (516)450-8155, സെക്രട്ടറി ബിന്ദു സത്യ (732)213-5346, ട്രഷറാർ സിറിയക് എബ്രഹാം (732)259-1037 എന്നിവർ അറിയിച്ചു.

മഹാബലിയുടെ അത്ത്യുത്തമ ഭരണകാലമെന്ന ഇതിഹാസത്തിൽ നിന്ന് ജനിച്ച തിരുവോണം, പൂക്കളുടെയും വിരുന്നുകളുടെയും ഉത്സവം മാത്രമല്ല; ഒരു ഭരണാധികാരിയുടെ മഹത്വം, നീതി, കാരുണ്യം, തന്റെ ജനങ്ങളിലെ ഏറ്റവും താഴ്ന്നവരുടെ ക്ഷേമ പാലനം എന്നിങ്ങനെ കാലം കൊതിയ്ക്കുന്ന സദ് വാഴ്ച്ചകളുടെ ജീവിക്കുന്ന ഓർമ്മപ്പെടുത്തൽ കൂടിയാണ്. സാരാംശത്തിൽ, ഓണം കർഷകന്റെ മാനസികാവസ്ഥയെ വഹിക്കുന്നു – ക്ഷമ, പ്രത്യാശ, മണ്ണുമായി ആഴത്തിൽ ബന്ധപ്പെട്ടിരിക്കുന്ന കഠിനാധ്വാനം, വിനയം, പ്രകൃതിയോടുള്ള ബഹുമാനം എന്നിവയിലൂടെയാണ് അഭിവൃദ്ധി വളർത്തിയെടുക്കുന്നതെന്ന് തിരുവോണം മലയാളിയെ പഠിപ്പിക്കുന്നു. ഈ സന്ദേശം അമേരിക്കയിൽ വളരുന്ന പുതിയ തലമുറകൾക്ക്, കൈമാറുവാനുള്ള എല്ലാ മലയാളികളുടെയും ശ്രമങ്ങളോട് ഐക്യം പ്രകടിപ്പിക്കുക എന്നതു കൂടിയാണ് “നാമം ഓണം” ലക്ഷ്യം വയ്ക്കുന്നത് എന്ന് നാമം ഭാരവാഹികൾ കൂട്ടിച്ചേർത്തു.