പി പി ചെറിയാൻ
അറ്റ്ലാന്റ : ക്രൈസ്തവ സംഗീതാസ്വാദകർക്കായി ഒരുക്കിയ ഓൺലൈൻ സംഗീതപരിപാടിയായ ‘സ്വർഗീയ നാദം’ വോള്യം 48 വിജയകരമായി നടന്നു. ഓഗസ്റ്റ് 28 വെള്ളിയാഴ്ച ഡാലസ് സമയം വൈകുന്നേരം 7:15-ന് സൂം പ്ലാറ്റ്ഫോമിലൂടെയാണ് പരിപാടി സംപ്രേഷണം ചെയ്തത്.
പ്രശസ്ത ക്രൈസ്തവ ഗായകനും ഗാനരചയിതാവുമായ പാസ്റ്റർ ജോൺ മാത്യു തെക്കുതോട് പങ്കെടുത്ത ‘Face to Face’ അഭിമുഖമായിരുന്നു ഈ പതിപ്പിന്റെ പ്രധാന ആകർഷണം. സംഗീത ശുശ്രൂഷയെക്കുറിച്ചും ക്രൈസ്തവ ഗാനങ്ങളുടെ ആത്മീയ ആഴത്തെക്കുറിച്ചും അദ്ദേഹം തൻ്റെ ചിന്തകൾ പങ്കുവെച്ചു.
“പാട്ടുകൾ പാടുന്ന ആളുകളേക്കാൾ ഉപരി അവയിലെ വരികളും സന്ദേശവുമാണ് നമ്മൾ ശ്രദ്ധിക്കേണ്ടത്. മനുഷ്യരും ലോകവും മാറിപ്പോയാലും ആഴമുള്ള ആത്മീയ ഗാനങ്ങൾ തലമുറകളോളം ആളുകൾക്ക് ആശ്വാസവും അനുഗ്രഹവുമായി നിലനിൽക്കും,” എന്ന് പാസ്റ്റർ ജോൺ മാത്യു അഭിമുഖത്തിൽ ഓർമ്മിപ്പിച്ചു. സംഘാടകരായ സണ്ണിയെയും അലക്സിനെയും പ്രോഗ്രാമിന്റെ മികവിനായി അദ്ദേഹം പ്രത്യേകമായി അഭിനന്ദിക്കുകയും ചെയ്തു.
പത്തനംതിട്ട തെക്കുതോട് സ്വദേശിയായ പാസ്റ്റർ ജോൺ മാത്യു, 2011 മുതൽ മുഴുവൻ സമയ ശുശ്രൂഷാരംഗത്ത് സജീവമാണ്. ഷാർജ ചർച്ച് ഓഫ് ഗോഡ് ഫുൾ ഗോസ്പൽ സീനിയർ പാസ്റ്ററായ അദ്ദേഹം 80-ഓളം ഭക്തിഗാനങ്ങൾ രചിച്ചിട്ടുണ്ട്. 2020, 2024 വർഷങ്ങളിലെ മാരാമൺ കൺവെൻഷനുകളിലും അദ്ദേഹത്തിന്റെ ഗാനങ്ങൾ ആലപിക്കപ്പെട്ടിട്ടുണ്ട്. യു.എ.ഇ യുണൈറ്റഡ് പെന്തക്കോസ്തൽ ഫെലോഷിപ്പ് മുൻ പ്രസിഡന്റും നിലവിൽ ചർച്ച് ഓഫ് ഗോഡ് യു.എ.ഇ നാഷണൽ ട്രഷററുമാണ്.
റവ. വി. ജെ. മാത്യു പ്രാരംഭ പ്രാർത്ഥനയ്ക്കും പാസ്റ്റർ തോമസ് കുര്യൻ സമാപന പ്രാർത്ഥനയ്ക്കും നേതൃത്വം നൽകി. സണ്ണി, ജോജു, സാബു, സിജി, അജി, റീന, ജെസ്സി എന്നിവർ ഗാനങ്ങൾ ആലപിച്ചു. സംഗീതവും ആത്മീയ ചിന്തകളും സമന്വയിച്ച പരിപാടി സംഗീതാസ്വാദകർക്ക് മികച്ചൊരു അനുഭവമായി മാറി.
Leave a Comment
Your comment will be visible after admin approval.