പി പി ചെറിയാൻ
സാന്‍ഫ്രാന്‍സിസ്‌കോ: തങ്ങൾക്ക് എല്ലാം അറിയാമെന്ന് ‘തികച്ചും ബോധ്യമുള്ള’ ഒരു കൂട്ടം ആളുകളാണ് ഇന്ത്യയെ നയിക്കുന്നതെന്ന്കോൺഗ്രസ് നേതാവ് രാഹുൽ ഗാന്ധി. അമേരിക്കയിലെ സാൻഫ്രാൻസിസ്‌കോയിൽ ഇന്ത്യൻ സമൂഹത്തെ അഭിസമ്പോധന ചെയ്തു നടത്തിയ പ്രസംഗത്തിൽ പറഞ്ഞു. അവർക്ക് ദൈവത്തോടൊപ്പമിരുന്ന് കാര്യങ്ങൾ വിശദീകരിക്കാം, പ്രധാനമന്ത്രി അത്തരത്തിലുള്ള ഒരു മാതൃകയാണെന്നും രാഹുൽ ഗാന്ധി വിമർശിച്ചു.
“നിങ്ങൾ മോദിജിയെ ദൈവത്തിന്റെ അരികിൽ ഇരുത്തിയാൽ, പ്രപഞ്ചം എങ്ങനെ പ്രവർത്തിക്കുന്നുവെന്ന് മോദിജി ദൈവത്തോട് വിശദീകരിക്കാൻ തുടങ്ങും. അതോടെ ദൈവം ആശയക്കുഴപ്പത്തിലാകും. കേൾക്കുമ്പോൾ ഇതൊക്കെ തമാശയാണ്, പക്ഷേ ഇതാണ് നടക്കുന്നത്. എല്ലാം മനസ്സിലാക്കുന്ന ഒരു കൂട്ടം ആളുകൾ. ശാസ്ത്രജ്ഞർക്ക് ശാസ്ത്രം, ചരിത്രകാരന്മാർക്ക് ചരിത്രം, സൈന്യത്തിന് യുദ്ധം. അതിന്റെ കാതൽ മധ്യസ്ഥതയാണ്, അവർക്ക് യഥാർത്ഥത്തിൽ ഒന്നും മനസ്സിലാകുന്നില്ല. കാരണം ജീവിതത്തിൽ നിങ്ങൾ കേൾക്കാൻ തയ്യാറല്ലെങ്കിൽ ഒന്നും മനസ്സിലാക്കാൻ കഴിയില്ല , രാഹുൽ ഗാന്ധി പറഞ്ഞു.
തൊഴിലില്ലായ്മ, വിലക്കയറ്റം, രോഷത്തിന്റെയും വിദ്വേഷത്തിന്റെയും വ്യാപനം, തകർന്നുകൊണ്ടിരിക്കുന്ന വിദ്യാഭ്യാസ സമ്പ്രദായം തുടങ്ങിയ പ്രശ്‌നങ്ങൾ പരിഹരിക്കാൻ പ്രധാനമന്ത്രി മോദിക്കും അദ്ദേഹത്തിന്റെ സർക്കാരിനും കഴിയുന്നില്ല. “ബിജെപിക്ക് ഈ വിഷയങ്ങൾ ശരിക്കും ചർച്ച ചെയ്യാൻ കഴിയില്ല, അതിനാലാണ് അവർ ചെങ്കോൽ കാര്യം ചർച്ചക്കെടുക്കുന്നതു ,” ചെങ്കോൽ വിവാദത്തെ പരാമർശിച്ച് രാഹുൽ ഗാന്ധി പറഞ്ഞു.
യുഎസ് പര്യടനത്തിനായി കോണ്‍ഗ്രസ് നേതാവ് രാഹുല്‍ ഗാന്ധി ചൊവ്വാഴ്ച സാന്‍ഫ്രാന്‍സിസ്‌കോയിലെത്തി. ഇന്ത്യന്‍ ഓവര്‍സീസ് കോണ്‍ഗ്രസ് ചെയര്‍പേഴ്സണ്‍ സാം പിട്രോഡയും ഐഒസിയിലെ മറ്റ് അംഗങ്ങളും അദ്ദേഹത്തെ വിമാനത്താവളത്തില്‍ സ്വീകരിച്ചു. എമിഗ്രേഷന്‍ ക്ലിയറന്‍സിനായി രാഹുല്‍ ഗാന്ധിക്ക് വിമാനത്താവളത്തില്‍ രണ്ട് മണിക്കൂര്‍ കാത്തിരിക്കേണ്ടി വന്നതായി പാര്‍ട്ടി വൃത്തങ്ങള്‍ അറിയിച്ചു.
രാഹുല്‍ ക്യൂവില്‍ നില്‍ക്കുമ്പോള്‍, വിമാനത്തില്‍ അദ്ദേഹത്തോടൊപ്പം യാത്ര ചെയ്തിരുന്നവര്‍ സെല്‍ഫിയെടുത്തു. എന്തിനാണ് ക്യൂവില്‍ നില്‍ക്കുന്നതെന്ന് ആളുകള്‍ ചോദിച്ചപ്പോള്‍, ‘ഞാന്‍ ഒരു സാധാരണക്കാരനാണ്, എനിക്കിത് ഇഷ്ടമാണ്, ഞാന്‍ ഇനി എംപിയല്ല’ എന്നായിരുന്നു രാഹുല്‍ ഗാന്ധിയുടെ മറുപടി.
തന്റെ ഒരാഴ്ചത്തെ യുഎസ്എ പര്യടനത്തില്‍ ഇന്ത്യന്‍ അമേരിക്കക്കാരെ അഭിസംബോധന ചെയ്യാനും വാള്‍ സ്ട്രീറ്റ് എക്‌സിക്യൂട്ടീവുകളുമായും യൂണിവേഴ്‌സിറ്റി വിദ്യാര്‍ത്ഥികളുമായും സംവദിക്കാനും സാധ്യതയുണ്ട്. ജൂണ്‍ 4 ന് ന്യൂയോര്‍ക്കില്‍ ഒരു പൊതു സമ്മേളനത്തോടെ അദ്ദേഹം തന്റെ യാത്ര അവസാനിപ്പിക്കും.
രാഹുൽ ഗാന്ധിയുടെ യാത്രയുടെ ഉദ്ദേശ്യം, മൂല്യങ്ങളും കാഴ്ചപ്പാടുകളും പ്രോത്സാഹിപ്പിക്കുന്നതിനായി അമേരിക്കയിലും വിദേശത്തും വർദ്ധിച്ചുവരുന്ന ഇന്ത്യൻ പ്രവാസികൾ ഉൾപ്പെടെ വിവിധ വ്യക്തികളുമായും സ്ഥാപനങ്ങളുമായും മാധ്യമങ്ങളുമായും ബന്ധിപ്പിക്കുകയും സംവദിക്കുകയും പുതിയ സംഭാഷണം ആരംഭിക്കുകയും ചെയ്യുക എന്നതാണ്. സ്വാതന്ത്ര്യം, ഉൾപ്പെടുത്തൽ, സുസ്ഥിരത, നീതി, സമാധാനം, ലോകമെമ്പാടുമുള്ള അവസരങ്ങൾ എന്നിവയിൽ ശ്രദ്ധ കേന്ദ്രീകരിക്കുന്ന യഥാർത്ഥ ജനാധിപത്യം,” പിട്രോഡ പ്രസ്താവനയിൽ പറഞ്ഞു.
