കൊച്ചി : സാങ്കേതിക തകരാറിനെ തുടർ‌ന്ന് മുംബൈയിൽ നിന്നുള്ള വിമാനം വൈകുന്നത് നെടുമ്പാശേരിയിൽ യാത്രക്കാരെ വലച്ചു. നെടുമ്പാശേരിയില്‍ നിന്ന് വിദേശത്തേക്ക് പോകേണ്ടവരാണ് ദുരിതത്തിലായത്. രാത്രി 8.30ന് മുംബൈയിലേക്ക് പോകേണ്ട എയര്‍ ഇന്ത്യ വിമാനമാണ് എത്താത്തത്. യാത്രികർ പ്രതിഷേധിച്ചതിനേത്തുടർന്ന് ചിലരെ 9.15നുള്ള വിമാനത്തിൽ യാത്രയാക്കി. മറ്റുള്ളവരെ ഹോട്ടലുകളിലേക്ക് മാറ്റി.
അതേസമയം ദുബായിയിൽനിന്ന് കൊച്ചിയിലേക്കുള്ള എയർ ഇന്ത്യ എക്സ്പ്രസും വൈകുന്നു. യുഎഇ സമയം വൈകിട്ട് 6.25ന് പുറപ്പെടേണ്ട വിമാനമാണ് വൈകിയത്. വിമാനം ഒരുമണിക്കൂറിലേറെ വൈകുമെന്ന് നേരത്തെ അറിയിപ്പുണ്ടായിരുന്നു. എന്നാൽ രാത്രി 7.40ന് വിമാനത്തിൽ കയറിയ യാത്രക്കാരെ തിരിച്ചിറക്കുകയായിരുന്നു.
