ട്രംപിന്റെ വമ്പൻ സ്മാരക പദ്ധതിക്ക് കോടതിയുടെ തിരിച്ചടി, നിര്‍മാണം തടഞ്ഞ് ജഡ്ജി ഉത്തരവിട്ടു

വാഷിങ്ടൺ: അമേരിക്കൻ പ്രസിഡന്റ് ഡോണൾഡ് ട്രംപിന്റെ വമ്പൻ സ്മാരക പദ്ധതിക്ക് കോടതിയുടെ തിരിച്ചടി. വാഷിങ്ടണിൽ നിർമിക്കാൻ ഉദ്ദേശിക്കുന്ന കൂറ്റൻ സ്മാരക കവാടത്തിന്റെ നിർമാണ പ്രവർത്തനങ്ങൾ തടഞ്ഞ് ഫെഡറൽ ജഡ്ജി ഉത്തരവിട്ടു. ഫെഡറൽ ജഡ്ജി ടാന്യ ചുട്കനാണ് 14 ദിവസത്തേക്ക് താൽക്കാലിക സ്റ്റേ അനുവദിച്ചത്. നാഷണൽ ക്യാപിറ്റൽ പ്ലാനിങ് കമ്മീഷൻ 8-4 വോട്ടുകൾക്ക് പദ്ധതിക്ക് അനുമതി നൽകി മണിക്കൂറുകൾക്കകമാണ് കോടതി ഇടപെടൽ.

നിർമാണം നഗരത്തിലെ ഗതാഗതത്തെയും അടിയന്തര സേവനങ്ങളെയും പ്രതികൂലമായി ബാധിക്കുമെന്നും സാമ്പത്തിക നഷ്ടമുണ്ടാക്കുമെന്നും ചൂണ്ടിക്കാട്ടി വാഷിങ്ടൺ ഡിസിയും വിർജീനിയയും നൽകിയ ഹർജികളാണ് കോടതി പരിഗണിച്ചത്. നിർമാണം തിടുക്കത്തിൽ ആരംഭിക്കുന്നത് പൊതുജനങ്ങൾക്ക് ബുദ്ധിമുട്ടുണ്ടാക്കാമെന്നും കോടതി വിലയിരുത്തി.

ട്രംപിന്റെ വ്യക്തിപരമായ കീർത്തിക്കുവേണ്ടിയാണ് പദ്ധതി നടപ്പാക്കുന്നതെന്ന വിമർശനവുമായി ഡെമോക്രാറ്റിക് നേതാക്കൾ രംഗത്തെത്തിയിരുന്നു. പൊതുജനനന്മയേക്കാൾ രാഷ്ട്രീയ പ്രചാരണത്തിനാണ് പദ്ധതിയിലൂടെ മുൻഗണന നൽകുന്നതെന്നാണ് വിമർശകരുടെ ആരോപണം.