ഇസ്രയേലിൽ പുതിയ സർക്കാർ: ബെന്യാമിൻ നെതന്യാഹുവിന്റെ മുഖ്യ എതിരാളിയായ ഗാദി ഐസൻകോട്ടിനെ ക്ഷണിച്ചു

ജറുസലം: ഇസ്രയേലിൽ പുതിയ സർക്കാർ രൂപീകരിക്കാനായി പ്രസിഡന്റ് ഐസക് ഹെർസോഗ് ആദ്യം അവസരം നൽകുന്നത് നിലവിലെ പ്രധാനമന്ത്രി ബെന്യാമിൻ നെതന്യാഹുവിന്റെ മുഖ്യ എതിരാളിയായ ഗാദി ഐസൻകോട്ടിന്. ഇക്കാര്യം അറിയിച്ചെന്നും ഐസൻകോട്ടിനെ ഇന്ന് ഔദ്യോഗിക കൂടിക്കാഴ്ചയ്ക്കു ക്ഷണിച്ചിട്ടുണ്ടെന്നും ഹെർസോഗിന്റെ വക്താവ് അറിയിച്ചു. 120 അംഗ പാർലമെന്റിൽ 61 സീറ്റ് ഭൂരിപക്ഷം ഉറപ്പിക്കാനായി, ഐസൻകോട്ടിന്റെ യാഷർ പാർട്ടി നയിക്കുന്ന പ്രതിപക്ഷസഖ്യത്തിന് അറബ് പാർട്ടി പിന്തുണ നൽകിയിരുന്നു.

മുൻ സൈനിക മേധാവിയാണ് ഐസൻകോട്ട്. ഭീകരവാദികളെ പിന്തുണയ്ക്കുന്നവരുമായി ചേർന്ന് ധൃതിപിടിച്ച് സർക്കാർ രൂപീകരിക്കരുതെന്നും ഐക്യ സർക്കാർ രൂപീകരിക്കണമെന്നും നെതന്യാഹു ആവശ്യപ്പെട്ടു. ഹമാസിനെ ഭീകര സംഘടനയായി അംഗീകരിക്കുന്ന പാർട്ടികളെ മാത്രമേ സർക്കാരിൽ ഉൾപ്പെടുത്തൂ എന്ന് ഐസൻകോട്ടിന്റെ പാർട്ടിയായ ‘യാഷർ’ വ്യക്തമാക്കി. 120 അംഗങ്ങളുള്ള ഇസ്രയേൽ പാർലമെന്റായ നെസെറ്റിൽ കേവലഭൂരിപക്ഷമായ 61 സീറ്റുകൾ നേടാൻ ഇരു വിഭാഗത്തിനും കഴിഞ്ഞിട്ടില്ല. നെതന്യാഹുവിന്റെ സഖ്യത്തിന് 53 സീറ്റുകളും പ്രതിപക്ഷ പാർട്ടികൾക്ക് 48 സീറ്റുകളുമാണ് ലഭിച്ചത്. അറബ് പാർട്ടികൾക്ക് 19 സീറ്റുണ്ട്.