ടെൽ അവീവ്: ഹമാസ് ഭീകര സംഘടനയെയ ഐഎസ്‌ഐഎസിനോട് ഉപമിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. ഐഎസ്‌ഐഎസ് ചെയ്യുന്നത് പോലെ നീച പ്രവൃത്തിയാണ് ഹമാസും ചെയ്യുന്നതെന്നും ഐഎസിനെ തകർത്തത് പോലെ തന്നെ ഹമാസിനെയും ഇല്ലായ്മ ചെയ്യണമെന്നും പ്രധാനമന്ത്രി പറഞ്ഞു.
ഐഎസ്‌ഐഎസിനോട് പെരുമാറിയതുപോലെ തന്നെയാകണം ഹമാസിനോടും പെരുമാറേണ്ടത്. രാഷ്‌ട്രങ്ങൾ അവരെ അകറ്റണം, ആരും അഭയം നൽകരുതെന്നും അവർക്ക് സഹായഹസ്തങ്ങൾ നീട്ടുന്നവരെയും സമാനരീതിയിൽ പരിഗണിക്കണമെന്നും ബെഞ്ചമിൻ നെതന്യാഹു പറഞ്ഞു.
നാഗരികതയുടെ ശത്രുവാണ് ഹമാസ് എന്ന് അവർ സ്വയം തെളിയിച്ചിട്ടുണ്ട്. എന്നാൽ നാഗരികതയുടെ ശക്തികൾ തിന്മയുടെ മേൽ വിജയിക്കുമെന്നും പ്രധാനമന്ത്രി ആവർത്തിച്ചു. കഠിനമായ ദിനങ്ങൾ നമുക്ക് മുൻപിലുണ്ടാകുമെന്നും എന്നാൽ ആരും ഭയപ്പെടേണ്ടതില്ലെന്നും വിജയം സനിശ്ചിതമാണെന്നും ബെഞ്ചമിൻ നെതന്യാഹു വ്യക്തമാക്കി.
ഇസ്രായേലിന് നൽകുന്ന പരിഗണനയ്‌ക്കും പിന്തുണയ്‌ക്കും യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കന് നന്ദി അറിയിക്കുന്നതായും അദ്ദേഹം പറഞ്ഞു. തിന്മയ്‌ക്കെതിരായ പോരാട്ടത്തിലെ ഐക്യമാണ് പ്രകടമാകുന്നതെന്നും അമേരിക്കയുടെ അസന്ദിഗ്‌ദ്ധമായ പിന്തുണ ഹമാസിനെ തകർക്കുന്നതിന് ഇസ്രായേലിന് സഹായകമാകുമെന്നും പ്രധാനമന്ത്രി പറഞ്ഞു.
