‘മേയ്‌ഡേ’ പ്രഖ്യാപിച്ച് അമേരിക്കൻ എയർലൈൻസ് വിമാനം ഫീനിക്സിൽ തിരിച്ചിറങ്ങി

Global Indian Writer · November 20, 2026 · 1 min read · 0 Comments · 0 Shares

അനിൽ മറ്റത്തിക്കുന്നേൽ

ഫീനിക്സ് (അരിസോണ): ഒറിഗണിലെ പോർട്ട്‌ലാൻഡിലേക്ക് പുറപ്പെട്ട അമേരിക്കൻ എയർലൈൻസ് വിമാനം പറന്നുയർന്നതിന് പിന്നാലെ അടിയന്തരാവസ്ഥ പ്രഖ്യാപിച്ച്ഫീനിക്സ് സ്കൈ ഹാർബർ രാജ്യാന്തര വിമാനത്താവളത്തിൽ തിരിച്ചിറങ്ങി. നവംബർ 19 വ്യാഴാഴ്ചയാണ് സംഭവം. AA3230 സർവീസ് നടത്തിയ എയർബസ് A319 വിമാനത്തിൽ യാത്രക്കാരും ജീവനക്കാരുമടക്കം 120 പേർ ഉണ്ടായിരുന്നതായി പൈലറ്റുമാർ എയർ ട്രാഫിക് കൺട്രോളിനെ അറിയിച്ചു.

തൊട്ടുപിന്നാലെ പുറപ്പെട്ട സ്കൈവെസ്റ്റ് വിമാനത്തിലെ ജീവനക്കാർ, അമേരിക്കൻ എയർലൈൻസ് വിമാനത്തിന്റെ ഒരു എൻജിനിന് സമീപം തീജ്വാല കണ്ടതായും ദ്രാവകം ചോരുന്നതായി സംശയമുണ്ടെന്നും കൺട്രോളർമാരെ അറിയിച്ചു. ഈ വിവരം കൈമാറിയപ്പോൾ വിമാനത്തിന്റെ ഹൈഡ്രോളിക് സംവിധാനത്തിൽ തകരാർഅനുഭവപ്പെടുന്നതായി പൈലറ്റുമാർ പറഞ്ഞു. പിന്നാലെ ‘മേയ്‌ഡേ’ പ്രഖ്യാപിച്ച അവർ ഫീനിക്സിലേക്ക് മടങ്ങാൻ ദിശാനിർദേശം തേടി. ഇറങ്ങുന്നതിന് മുമ്പ് കൂടുതൽ ഇന്ധനം ഉപയോഗിച്ചുതീർക്കാൻ സമയം വേണമോ എന്ന് കൺട്രോളർമാർ
ചോദിച്ചപ്പോൾ ആവശ്യമില്ലെന്ന് പൈലറ്റുമാർ അറിയിച്ചു.

പറന്നുയർന്ന് ഏകദേശം 20 മിനിറ്റിനകം വിമാനം സുരക്ഷിതമായി തിരിച്ചിറങ്ങിയതായാണ് ലഭ്യമായ റിപ്പോർട്ട്. പരിക്കുകളൊന്നും റിപ്പോർട്ട് ചെയ്തിട്ടില്ല. സ്കൈവെസ്റ്റ് ജീവനക്കാർ തീജ്വാല കണ്ടതായി അറിയിച്ചെങ്കിലും എൻജിനിൽ തീപിടിത്തമുണ്ടായിരുന്നോ എന്നതും ഹൈഡ്രോളിക് തകരാറിന്റെ കാരണവും ഔദ്യോഗികമായി സ്ഥിരീകരിച്ചിട്ടില്ല.

Share this story

Leave a Comment

Your comment will be visible after admin approval.