ഷിക്കാഗോ: ഷിക്കാഗോ പബ്ലിക് സ്‌കൂളിലെ രണ്ട് വിദ്യാര്‍ത്ഥികളെ വെള്ളിയാഴ്ച ഉച്ചതിരിഞ്ഞ് രണ്ട് കാറുകളിലായി വന്ന മുഖംമൂടി ധരിച്ച അക്രമികള്‍ വെടിവെച്ച് കൊന്നതായി പോലീസ് അറിയിച്ചു.
17 എന്‍. സ്റ്റേറ്റ് സെന്റ്. ലെ സിപിഎസ്ചാര്‍ട്ടര്‍ സ്‌കൂളായ ഇന്നൊവേഷന്‍സ് ഹൈസ്‌കൂളിലെ വിദ്യാര്‍ത്ഥികളായ റോബര്‍ട്ട് ബോസ്റ്റണ്‍ (16), മൊണ്ടേരിയോ വില്യംസ് (17) എന്നിവരാണ് കൊല്ലപ്പെട്ടതെന്ന് പോലീസ് പറഞ്ഞു.
റോബര്‍ട്ട് ബോസ്റ്റണും, മൊണ്ടേരിയോ വില്യംസിനും ഉച്ചയ്ക്ക് 12.25 ഓടെയാണ് വെടിയേറ്റത്. ഇരുവരെയും നോര്‍ത്ത് വെസ്റ്റേണ്‍ ഹോസ്പിറ്റലില്‍ എത്തിച്ചെങ്കിലും രക്ഷിക്കാനായില്ലെന്ന് പോലീസ് പറഞ്ഞു.
ഇരുണ്ട നിറത്തിലുള്ള സെഡാനും ഒരു എസ്യുവിയും ആള്‍ക്കൂട്ടത്തിലേക്ക് നീങ്ങിയപ്പോള്‍ മുഖംമൂടി ധരിച്ച തോക്കുധാരികള്‍ ഇറങ്ങി വെടിയുതിര്‍ക്കുകയായിരുന്നുവെന്ന് പോലീസ് പറഞ്ഞു. അക്രമികളില്‍ നാല് പേര്‍ ഒരു വാഹനത്തില്‍ രക്ഷപ്പെട്ടു.
ആരെയും കസ്റ്റഡിയില്‍ എടുത്തിട്ടില്ല. വെടിവെപ്പിനെ കുറിച്ച് എന്തെങ്കിലും വിവരം ലഭിക്കുന്നവര്‍ സിപിഡി ഡിറ്റക്ടീവുകളെ ബന്ധപ്പെടാന്‍ അഭ്യര്‍ത്ഥിച്ചു.
