കൊച്ചി: കര്‍ണാടക ഷിരൂരില്‍ മണ്ണിടിച്ചില്‍പ്പെട്ട് കാണാതായ കോഴിക്കോട് സ്വദേശി അര്‍ജുനായുള്ള തിരച്ചില്‍ ഇന്ന് പുനരാരംഭിക്കുമെന്ന് എം കെ രാഘവന്‍ എം പി. തിരച്ചില്‍ ഇന്ന് പുനരാരംഭിക്കുമെന്ന് കര്‍ണാടക സര്‍ക്കാറും കാര്‍വാര്‍ എംഎല്‍എ സതീഷ് കൃഷ്ണ സെയിലും അറിയിച്ചതായി എം കെ രാഘവന്‍ എം പി പറഞ്ഞു. പ്രദേശത്തെ കാലാവസ്ഥ മെച്ചപ്പെട്ട പശ്ചാത്തലത്തിലാണ് തിരച്ചില്‍ പുനരാരംഭിക്കുന്നത്. ഫേസ്ബുക്കിലൂടെയായിരുന്നു എം കെ രാഘവന്‍ എംപിയുടെ പ്രതികരണം.
ഷിരൂരിലെ തിരച്ചില്‍ നാല് ദിവസത്തെ ഇടവേളയ്ക്ക് ശേഷം ഇന്നലെ പുനരാരംഭിക്കും എന്നായിരുന്നു നേരത്തെ പറഞ്ഞിരുന്നത്. എന്നാല്‍ അതിന് സാധിക്കാതെ വരികയായിരുന്നു. തിരച്ചില്‍ പുനരാരംഭിക്കുന്നത് സംബന്ധിച്ച് തങ്ങള്‍ക്ക് അറിയിപ്പ് ലഭിച്ചില്ലെന്ന് ഇന്ന് അര്‍ജുന്റെ കുടുംബവും പ്രതികരിച്ചതിന് പിന്നാലെയാണ് ഇക്കാര്യത്തില്‍ എം പി ഒരു അറിയിപ്പുമായി രംഗത്തെത്തുന്നത്.
