ന്യൂഡൽഹി: കിഴക്കൻ ലഡാക്കിലെ ദെപ്സാംഗ്, ദെംചോക് എന്നീ മേഖലകളിൽ നിന്ന് ഇന്ത്യ-ചൈന സൈനികപിന്മാറ്റം പൂർത്തിയായി. ഇരുരാജ്യങ്ങളിലെയും സൈന്യം സഹകരിച്ചുകൊണ്ടുള്ള പട്രോളിംഗ് വൈകാതെ ആരംഭിക്കുമെന്ന് അധികൃതർ അറിയിച്ചു. ദീപാവലിയോട് അനുബന്ധിച്ച് സൈനികർ പരസ്പരം മധുരം കൈമാറുന്ന ചടങ്ങ് വ്യാഴാഴ്ച നടക്കും.
സൈനികപിന്മാറ്റത്തിന്റെ ഭാഗമായി ദെപ്സാംഗ്, ദെംചോക് മേഖലകളിലുള്ള അടിസ്ഥാനസൗകര്യങ്ങൾ നീക്കം ചെയ്യുന്ന നടപടികൾ പുരോഗമിക്കുകയാണ്. ഇരുരാജ്യങ്ങളിലെയും സൈന്യം ഇക്കാര്യം പരിശോധിച്ച് ഉറപ്പുവരുത്തും.
നിയന്ത്രണരേഖയിൽ നിന്ന് ഇരുരാജ്യങ്ങളുടെയും സൈന്യങ്ങൾ പിന്മാറുമെന്ന തീരുമാനം കഴിഞ്ഞയാഴ്ചയാണ് ഇന്ത്യ പ്രഖ്യാപിച്ചത്. തൊട്ടുപിന്നാലെ ചൈന ഇക്കാര്യം സ്ഥിരീകരിക്കുകയും ചെയ്തു. 2020 ഏപ്രിലിന് മുൻപുള്ള നിലയിലേക്ക് പട്രോളിംഗ് പുനരാരംഭിക്കാനാണ് നീക്കം. നാല് വർഷങ്ങൾക്ക് മുൻപ് നടന്ന ഗൽവാൻ സംഘർഷത്തെ തുടർന്നായിരുന്നു അതിർത്തിയിൽ സർവസന്നാഹങ്ങളുമായി ഇന്ത്യ സൈന്യത്തെ വിന്യസിച്ചത്.
