ന്യൂഡൽഹി: ഇന്ത്യക്കാർക്കെതിരായ അതിക്രമങ്ങളിൽ ഇടപെടാൻ പ്രധാനമന്ത്രി നരേന്ദ്ര മോദി ഉടൻ യു.എസ് പ്രസിഡന്റ് ഡോണൾഡ് ട്രംപുമായി സംസാരിക്കണമെന്ന് കോൺഗ്രസ്. ഇന്ത്യയുടെയും ഇന്ത്യക്കാരുടെയും അഭിമാനം സംരക്ഷിക്കുന്നതിൽ മോദി സർക്കാർ തുടർച്ചയായി പരാജയപ്പെടുകയാണെന്നും കോൺഗ്രസ് ജനറൽ സെക്രട്ടറി ജയ്റാം രമേശ് എക്സിൽ കുറിച്ചു.
ഇന്ത്യൻ വിദ്യാർഥിയെ കൈവിലങ്ങ് അണിയിച്ച് കുറ്റവാളിയെപോലെ യു.എസ് വിമാനത്താവളത്തിൽ നാടുകടത്തുന്നതിന്റെ വിഡിയോ പങ്കുവെച്ചായിരുന്നു ജയ്റാം രമേശിന്റെ വിമർശനം. അമേരിക്കയിലെ ലക്ഷക്കണക്കിന് ഇന്ത്യൻ വിദ്യാർഥികൾ ഭയത്തിലാണ്. ഇതിൽ മോദി ഇടപെടണം. പ്രധാനമന്ത്രി എല്ലാ വിഷയത്തിലും മൗനം തുടരുകയാണെന്നും അദ്ദേഹം കുറ്റപ്പെടുത്തി.
