തിരുവനന്തപുരം : കാനഡയിൽ ചെറു വിമാനം തകർന്നുണ്ടായ അപകടത്തിൽ മരിച്ച മലയാളി പൈലറ്റ് പൂജപ്പുര ചട്ടമ്പിസ്വാമി റോഡ് വിദ്യാധിരാജ നഗർ ‘ശ്രീശൈല’ത്തിൽ ഗൗതം സന്തോഷിന്റെ(27) മൃതദേഹം തിങ്കൾ നാട്ടിലെത്തിക്കും. പുലർച്ചെ 2.45 ന് തിരുവനന്തപുരം രാജ്യാന്തര വിമാനത്താവളത്തിൽ എത്തിക്കുന്ന മൃതദേഹം വീട്ടിലെത്തിച്ച ശേഷം ഉച്ചയ്ക്ക് തൈക്കാട് ശാന്തികവാടത്തിൽ സംസ്കരിക്കും.
മൃതദേഹം എംബാം ചെയ്യുന്നതും കാനഡയിൽ നിന്ന് തിരുവനന്തപുരത്തേക്ക് എത്തിക്കുന്നതും പ്രായോഗികമല്ലെന്ന നിലപാടായിരുന്നു കാനഡയിലെ എംബസി അധികൃതർക്ക്. കാനഡയിൽ സംസ്കരിക്കണമെന്നും അധികൃതർ നിർദേശിച്ചു. വീട്ടുകാരുടെ നിർബന്ധത്തിനു വഴങ്ങിയാണ് മൃതദേഹം നാട്ടിലെത്തിക്കാൻ ധാരണയായത്.
