കാഠ്മണ്ഡു: നേപ്പാളിലെ സമൂഹമാധ്യമങ്ങള്ക്കുള്ള നിരോധനം സര്ക്കാര് നീക്കി. നിരോധനം അവസാനിപ്പിക്കണമെന്നാവശ്യപ്പെട്ട് പ്രതിഷേധം ശക്തമാവുകയും 19 പേര് കൊല്ലപ്പെടുകയും ചെയ്തതിന് പിന്നാലെയാണ് നടപടി. സംഘര്ഷത്തിന്റെ പശ്ചാത്തലത്തില് നേപ്പാള് അതിര്ത്തിയില് ഇന്ത്യ സുരക്ഷ ശക്തമാക്കി.
ഈ മാസം നാലിനാണ് ഫേസ്ബുക്ക്, ഇന്സ്റ്റഗ്രാം, വാട്സാപ്പ്, യൂട്യൂബ് തുടങ്ങി 26 സമൂഹ മാധ്യമ പ്ലാറ്റ് ഫോമുകള് നേപ്പാള് സര്ക്കാര് നിരോധിച്ചത്. പുതിയ സോഷ്യല് മീഡിയ നിയമങ്ങള് പ്രകാരം കമ്പനികള് രജിസ്റ്റര് ചെയ്യുന്നതില് പരാജയപ്പെട്ടെന്ന് ചൂണ്ടിക്കാട്ടിയായിരുന്നു നിരോധനം. ഇതിനെതിരെയാണ് നേപ്പാളില് പ്രതിഷേധം ഉണ്ടായത്.
