ന്യൂയോർക്ക്: വ്യാപാര തർക്കങ്ങൾക്കും എച്ച്-1ബി വിസ ഫീസ് വർധനവിനും ശേഷം ഇന്ത്യയും യുഎസ്സും തമ്മിലുള്ള ബന്ധം മെച്ചപ്പെടുത്തുന്നതിന്റെ ഭാഗമായി വിദേശകാര്യ മന്ത്രി എസ്. ജയശങ്കർ യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി കൂടിക്കാഴ്ച നടത്തി. ഐക്യരാഷ്ട്രസഭയുടെ 80-ാമത് പൊതുസമ്മേളനത്തിന് മുന്നോടിയായാണ് ഈ ഉന്നതതല കൂടിക്കാഴ്ച നടന്നത്. എച്ച്-1ബി വിസാ പ്രശ്നങ്ങളും ഉഭയകക്ഷി വ്യാപാര വിഷയങ്ങളും ചർച്ചയിൽ പ്രധാന അജണ്ടയായി.
നേരത്തെ, കഴിഞ്ഞ ജൂലൈയിൽ വാഷിംഗ്ടണിൽ നടന്ന പത്താമത് ക്വാഡ് വിദേശകാര്യ മന്ത്രിമാരുടെ യോഗത്തിലാണ് ഇരുവരും അവസാനമായി കണ്ടുമുട്ടിയത്. അതിനുമുമ്പ് ജനുവരിയിലും അവർ തമ്മിൽ ചർച്ചകൾ നടന്നിരുന്നു.
യുഎസ് പ്രസിഡന്റ് ഇന്ത്യൻ ഉത്പന്നങ്ങൾക്ക് 25 ശതമാനം തീരുവ ചുമത്തിയതും റഷ്യൻ എണ്ണ ഇറക്കുമതിയുമായി ബന്ധപ്പെട്ട് മറ്റൊരു 25 ശതമാനം നികുതി ഏർപ്പെടുത്തിയതും ഇരു രാജ്യങ്ങളും തമ്മിലുള്ള വ്യാപാര ബന്ധത്തിൽ വലിയ വിള്ളലുണ്ടാക്കിയിരുന്നു. കൂടാതെ, എച്ച്-1ബി വിസ അപേക്ഷാ ഫീസ് 100,000 ഡോളറായി ഉയർത്താനുള്ള ഉത്തരവും ആശങ്കകൾക്ക് കാരണമായിരുന്നു. എന്നാൽ, ഈ വർധനവ് പുതിയ അപേക്ഷകർക്ക് മാത്രമാണ് ബാധകമെന്ന് വൈറ്റ് ഹൗസ് പിന്നീട് വ്യക്തമാക്കുകയുണ്ടായി.
ഈ തടസ്സങ്ങൾക്കിടയിലും, ഇരു രാജ്യങ്ങളും ഉഭയകക്ഷി നിക്ഷേപ ഉടമ്പടി ചർച്ചകൾ പുനരാരംഭിച്ചിട്ടുണ്ട്. ഇന്ത്യ യുഎസ് വ്യാപാരകരാറുമായി ബന്ധപ്പെട്ട ചര്ച്ചകള്ക്കായി കേന്ദ്ര മന്ത്രി പീയുഷ് ഗോയലും അമേരിക്കയിലെത്തിയിട്ടുണ്ട്.
ഒരു കരാറിലെത്താൻ തങ്ങൾക്ക് “പ്രയാസമുണ്ടാകില്ല” എന്ന് യുഎസ് പ്രസിഡന്റ് ഡൊണാൾഡ് ട്രംപ് അടുത്തിടെ ട്രൂത്ത് സോഷ്യലിൽ കുറിച്ചിരുന്നു. മോദിയുടെ നേതൃത്വത്തെ പ്രശംസിച്ച ട്രംപ്, യുക്രെയ്നിലെ സമാധാന ശ്രമങ്ങൾക്കുള്ള പിന്തുണയ്ക്കും നന്ദി അറിയിച്ചു. ഇതിന് മറുപടിയായി ഇന്ത്യ-യുഎസ് ബന്ധം ശക്തിപ്പെടുത്തുമെന്ന് പ്രധാനമന്ത്രി മോദി ഉറപ്പുനൽകി.
സെപ്റ്റംബർ 16-ന് യുണൈറ്റഡ് സ്റ്റേറ്റ്സ് ട്രേഡ് റെപ്രസെന്റേറ്റീവ് ഓഫീസിലെ ഉദ്യോഗസ്ഥർ ഇന്ത്യ സന്ദർശിച്ചപ്പോൾ “പോസിറ്റീവായ ചർച്ചകൾ നടന്നു” എന്ന് ഇന്ത്യൻ വാണിജ്യ വ്യവസായ മന്ത്രാലയം അറിയിച്ചു. യുഎസ്സുമായി “ലോകത്ത് നിലവിലുള്ള ഏറ്റവും മികച്ച ബന്ധങ്ങളിൽ ഒന്നാണ്” ഇന്ത്യയ്ക്കുള്ളതെന്ന് സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞിരുന്നു.
