ഷാജി രാമപുരം
ഡാളസ് : മാർത്തോമ്മാ ചർച്ച് ഓഫ് ഡാളസ് ഫാർമേഴ്സ് ബ്രാഞ്ച് ഇടവകയുടെ സുവർണ്ണ ജൂബിലി ആഘോഷങ്ങളുടെ ഭാഗമായി ഔദ്യോഗിക ജൂബിലി ലോഗോ പ്രകാശനം ചെയ്തു. 1976-ൽ സ്ഥാപിതമായ ഈ ഇടവക, മാർത്തോമ്മാ സഭയുടെ നോർത്ത് അമേരിക്കൻ ഭദ്രാസനത്തിന് കീഴിലുള്ള ഏറ്റവും വലിയ ഇടവകകളിൽ ഒന്നായി വളർന്നിരിക്കുകയാണ്. നിലവിൽ ഏകദേശം 500 കുടുംബങ്ങൾ ഈ ഇടവകയുടെ ഭാഗമാണ്.
അമ്പത് വർഷത്തെ ആത്മീയ പൈതൃകവും വിശ്വാസയാത്രയും പ്രതീകാത്മകമായി അവതരിപ്പിക്കുന്ന രീതിയിലാണ് സുവർണ്ണ ജൂബിലി ലോഗോ രൂപകൽപ്പന ചെയ്തിരിക്കുന്നത്. ക്രിസ്തീയ വിശ്വാസ മൂല്യങ്ങൾ, സഭയുടെ ദൗത്യം,ജീവിതം, സമൂഹത്തോടുള്ള ഉത്തരവാദിത്വം എന്നിവ ലോഗോയിലെ വിവിധ ഘടകങ്ങളിലൂടെ പ്രതിഫലിപ്പിക്കുന്നു. ‘Sojourners with Christ’ (Faith, Hope, Mission )എന്നതാണ് സുവർണ്ണ ജൂബിലിയുടെ ഔദ്യോഗിക തീംമായി തിരഞ്ഞെടുത്തിരിക്കുന്നത്.
ക്രിസ്തുവിനൊപ്പം യാത്ര ചെയ്യുന്ന വിശ്വാസ സമൂഹം എന്ന ഇടവകയുടെ ദർശനവും ആത്മീയ യാത്രയുമാണ് ഈ തീം മുന്നോട്ടുവയ്ക്കുന്നത്.സുവർണ്ണ ജൂബിലി ആഘോഷങ്ങളുടെ ഭാഗമായി ഒരു വർഷം നീണ്ടുനിൽക്കുന്ന വിവിധ ആത്മീയ, സാമൂഹിക, സാംസ്കാരിക പരിപാടികൾ ഇടവക ആസൂത്രണം ചെയ്തിട്ടുണ്ട്. പ്രത്യേക ആരാധനകൾ, ആത്മീയ സമ്മേളനങ്ങൾ, കുടുംബ സംഗമങ്ങൾ, ഇടവക സംഘടനകളുടെ പരിപാടികൾ, സാമൂഹിക സേവന പദ്ധതികൾ എന്നിവ ജൂബിലി ആഘോഷങ്ങളുടെ ഭാഗമായി സംഘടിപ്പിക്കും.
സുവർണ്ണ ജൂബിലി ആഘോഷങ്ങളുടെ ഭാഗമായി ഇടവകയുടെ അമ്പത് വർഷത്തെ ചരിത്രവും ആത്മീയ വളർച്ചയും സാമൂഹിക സേവന രംഗത്തെ സംഭാവനകളും സമഗ്രമായി രേഖപ്പെടുത്തുന്ന ഒരു സ്മരണിക (സുവനീർ) കൂടി പുറത്തിറക്കുമെന്ന് ജൂബിലി കമ്മിറ്റി അറിയിച്ചു. ഇടവകയുടെ രൂപീകരണം മുതൽ ഇന്നുവരെ നടന്ന പ്രധാന സംഭവങ്ങൾ, അപൂർവ ചിത്രങ്ങൾ, സന്ദേശങ്ങൾ, ലേഖനങ്ങൾ എന്നിവ ഈ സ്മരണികയിൽ ഉൾക്കൊള്ളിച്ചിരിക്കും. ജൂബിലി വർഷത്തിലെ പ്രധാന ആകർഷണങ്ങളിലൊന്നായിരിക്കും ഈ പ്രസിദ്ധീകരണം.
ഇടവകയിൽ റവ. എബ്രഹാം വി. സാംസൺ വികാരിയായും, റവ. ജെസ്വിൻ ജോൺ സഹ വികാരിയായും ശുശ്രൂഷ അനുഷ്ഠിച്ചു വരുന്നു. എബി തോമസിന്റെയും, ക്രിസ്റ്റോ മേക്കാട്ടുകുളത്തിന്റെയും നേതൃത്വത്തിലുള്ള സമർപ്പിത ജൂബിലി കമ്മിറ്റി വിവിധ ജൂബിലി സംരംഭങ്ങളും പരിപാടികളും ഏകോപിപ്പിച്ച് വിജയകരമായി നടപ്പിലാക്കുന്നതിനായി സജീവമായി പ്രവർത്തിച്ചുവരുന്നതായി അറിയിച്ചു.
നോർത്ത് അമേരിക്കയിലെ മാർത്തോമ്മാ സഭയുടെ ചരിത്രത്തിൽ തന്നെ ശ്രദ്ധേയമായ സംഭാവനകൾ നൽകിയ ഇടവകയായ ഡാളസ് ഫാർമേഴ്സ് ബ്രാഞ്ച് മാർത്തോമ്മാ ചർച്ച്, ആത്മീയതയോടൊപ്പം സാമൂഹിക സേവന രംഗത്തും ശക്തമായ സാന്നിധ്യം പുലർത്തുന്ന ഇടവകയായി അറിയപ്പെടുന്നു. സുവർണ്ണ ജൂബിലി ആഘോഷങ്ങൾ ഇടവകാംഗങ്ങൾക്കിടയിലെ ഐക്യവും സഹവർത്തിത്വവും കൂടുതൽ ശക്തിപ്പെടുത്തുവാൻ ഇടവക നേതൃത്വം ശ്രമിക്കുമെന്നും ഇടവക സുവർണ്ണ ജൂബിലി ആഘോഷങ്ങളുടെ പബ്ലിസിറ്റി കമ്മിറ്റിക്കു വേണ്ടി ജോബി ജോൺ അറിയിച്ചു.
