ഒമ്പത് വർഷത്തിന് ശേഷം ഫ്രിസ്കോ പുതിയ മേയർ : റോഡ് വിൽഹോവറെ പരാജയപ്പെടുത്തി മാർക്ക് ഹിൽ വിജയിച്ചു

പി.പി ചെറിയാൻ

ഫ്രിസ്കോ: ടെക്സസിലുള്ള ഫ്രിസ്കോ നഗരത്തിൽ നടന്ന മേയർ റൺഓഫ് (രണ്ടാം ഘട്ട) തിരഞ്ഞെടുപ്പിൽ മാർക്ക് ഹില്ലിന് ഉജ്ജ്വല വിജയം. പ്രമുഖ വ്യവസായിയായ റോഡ് വിൽഹോവറെയാണ് അദ്ദേഹം പരാജയപ്പെടുത്തിയത്. ആകെ രേഖപ്പെടുത്തിയ വോട്ടുകളിൽ 58 ശതമാനവും (19,632 വോട്ടുകൾ) മാർക്ക് ഹിൽ സ്വന്തമാക്കിയപ്പോൾ, വിൽഹോവറിന് 14,146 വോട്ടുകൾ മാത്രമാണ് നേടാനായത്.

കഴിഞ്ഞ മെയ് 2-ന് നടന്ന ആദ്യഘട്ട തിരഞ്ഞെടുപ്പിൽ ആർക്കും വ്യക്തമായ ഭൂരിപക്ഷം (50%-ൽ കൂടുതൽ) ലഭിക്കാത്തതിനെത്തുടർന്നാണ് ആദ്യ രണ്ട് സ്ഥാനങ്ങളിലെത്തിയ ഹില്ലും വിൽഹോവറും തമ്മിൽ റൺഓഫ് പോരാട്ടത്തിന് വഴിയൊരുങ്ങിയത്. അന്ന് 35 ശതമാനം വോട്ടുകളോടെ ഹില്ലും 31 ശതമാനം വോട്ടുകളോടെ വിൽഹോവറുമാണ് മുന്നിലെത്തിയിരുന്നത്.

അഭിഭാഷകനായ മാർക്ക് ഹിൽ നിലവിൽ ഫ്രിസ്കോ ഐ.എസ്.ഡി സ്കൂൾ ബോർഡ് അംഗമാണ്. വൻ വ്യവസായ വികസനവും ജനസംഖ്യാ വർധനവും നേരിടുന്ന ഫ്രിസ്കോ നഗരത്തിന്റെ ഗതാഗതക്കുരുക്ക്, പൊതുസുരക്ഷ, അടിസ്ഥാന സൗകര്യ വികസനം എന്നിവ കാര്യക്ഷമമായി കൈകാര്യം ചെയ്യുക എന്നതായിരിക്കും പുതിയ മേയറുടെ പ്രധാന ഉത്തരവാദിത്തം.