ആദ്യഫല ശേഖരണവും മാർത്തോമ ശ്ലീഹയുടെ ദുക്റോനോ പെരുന്നാളും ജൂൺ 28 മുതൽ ജൂലൈ 5 വരെ ഹൂസ്റ്റണിൽ

മലങ്കര ഓർത്തഡോക്സ് സുറിയാനി സഭയുടെ സൗത്ത് വെസ്റ്റ് അമേരിക്കൻ ഭദ്രാസനത്തിലെ ഹൂസ്റ്റൺ സെന്റ് തോമസ് ഓർത്തഡോക്സ് കത്തീഡ്രൽ ദേവാലയത്തിൽ 2026 ആദ്യഫല ശേഖരണവും മാർത്തോമ ശ്ലീഹയുടെ ദുക്റോനോ പെരുന്നാളും ജൂൺ 28 മുതൽ ജൂലൈ 5 വരെ നടക്കും.

ജൂൺ 28-ന് ആരംഭിക്കുന്ന ആഘോഷങ്ങൾ ജൂലൈ 5-ന് ഞായറാഴ്ച വിശുദ്ധ കുർബാനയോടും അനുബന്ധ ശുശ്രൂഷകളോടും കൂടി സമാപിക്കും. ഇടവകയുടെ മദ്ധ്യസ്ഥനായ വിശുദ്ധ തോമാശ്ലീഹായുടെ ഓർമ്മപ്പെരുന്നാളും ഈ അവസരത്തിൽ ഭക്തിപൂർവ്വം ആചരിക്കും.

ജൂൺ 28 – ആദ്യഫല ശേഖരണപെരുന്നാൾ

ജൂൺ 28-ഞായറാഴ്ച രാവിലെ 7.30-ന് പ്രഭാത നമസ്കാരവും വിശുദ്ധ കുർബാനയും, തുടർന്ന് കൊടിയേറ്റും, വിളവെടുപ്പ് ലേലം (Harvest Auction) എന്നിവ നടക്കും. രാവിലെ 11.30-ന് നടക്കുന്ന ആദ്യഫല ശേഖരണപെരുന്നാൾ ആശീർവാദ പ്രാർത്ഥനയും സ്നേഹവിരുന്നും ഉണ്ടായിരിക്കും.

“നിന്റെ സമ്പത്തുകൊണ്ടും നിന്റെ സകലവിളവിന്റെയും ആദ്യഫലങ്ങളാലും യഹോവയെ മാനിക്ക” (സദൃശവാക്യങ്ങൾ 3:9) എന്ന തിരുവചനത്തെ ആസ്പദമാക്കി സർവ്വശക്തനായ ദൈവത്തിന് നന്ദി അർപ്പിക്കുന്ന ആത്മീയ ആഘോഷമായാണ് ആദ്യഫല ശേഖരണപെരുന്നാൾ ക്രമീകരിച്ചിരിക്കുന്നത്.

ജൂലൈ 3 – മാർത്തോമ ശ്ലീഹയുടെ ദുക്റോനോ

വെള്ളിയാഴ്ച വൈകിട്ട് 6.00-ന് സന്ധ്യ നമസ്കാരത്തോടെ പെരുന്നാൾ ആഘോഷങ്ങൾക്ക് തുടക്കമാകും.

ജൂലൈ 4 – കുടുംബസംഗമവും ബസാറും

ശനിയാഴ്ച രാവിലെ 9.00 മുതൽ വാർഷിക ബസാർ, എം.എം.വി.എസ്, സൺഡേ സ്കൂൾ, എം.ജി.ഒ.സി.എസ്.എം. ഒ.സി.വൈ.എം, ഫോക്കസ്, പ്രയർ ഗ്രൂപ്പ്, തുടങ്ങി വിവിധ ആത്മീയ സംഘടനകൾ ഒരുക്കുന്ന വിവിധ പരിപാടികൾ, പ്രഭാതഭക്ഷണം, കുട്ടികളുടെ വിനോദപരിപാടികൾ, ഫുഡ് സ്റ്റാളുകൾ, വ്യാപാര സ്റ്റാളുകൾ എന്നിവ ഈ വർഷത്തെ കുടുംബസംഗമത്തിന്റെ പ്രത്യേകത ആയിരിക്കും.

വൈകിട്ട് 6.00-ന് സന്ധ്യ നമസ്കാരം, ഹൂസ്റ്റൺ വൈദീക സംഘത്തിന്റെ ഗാനശുശ്രൂഷ, പ്രഭാഷണം, റാസ, ലഘുഭക്ഷണം എന്നിവയോടെ ആഘോഷങ്ങൾ സമാപിക്കും.

ജൂലൈ 5 – മാർത്തോമ ശ്ലീഹയുടെ ദുക്റോനോ പെരുന്നാൾ ദിനം

ഞായറാഴ്ച രാവിലെ 8.00-ന് പ്രഭാത നമസ്കാരത്തോടനുബന്ധിച്ച് വിശുദ്ധ കുർബാനക്ക് സൗത്ത് വെസ്റ്റ് അമേരിക്കൻ ഭദ്രാസന മെത്രാപ്പോലീത്ത അഭിവന്ദ്യ ഡോ. തോമസ് മാർ ഇവാനിയോസ് മെത്രാപ്പോലീത്തയുടെ മുഖ്യകാർമ്മികത്വത്തിൽ വഹിച്ച് വിശുദ്ധ കുർബാന അർപ്പിക്കുകയും സന്ദേശം നൽകുകയും ചെയ്യും.

തുടർന്ന് 11.00-ന് ഈ വർഷം ഗ്രാജ്വാറ്റ് ചെയ്ത വിദ്യാർത്ഥികളെയും 90 വയസ്സിനു മുകളിലുള്ള മുതിർന്ന ഇടവകാംഗങ്ങളെയും ആദരിക്കുന്ന ചടങ്ങ് നടക്കും. തുടർന്ന് ആശീർവാദ പ്രാർത്ഥനയും സ്നേഹവിരുന്നും ഉണ്ടായിരിക്കും.

എല്ലാവർക്കും സ്വാഗതം

മലങ്കര ഓർത്തഡോക്സ് സഭയുടെ ആത്മീയതയും നസ്രാണി പാരമ്പര്യവും സമൂഹസൗഹൃദവും ഒരുമിപ്പിക്കുന്ന ഈ മഹോത്സവത്തിലേക്ക് എല്ലാ വിശ്വാസികളെയും കുടുംബങ്ങളെയും സുഹൃത്തുക്കളെയും ഹൂസ്റ്റൺ മലയാളി സമൂഹത്തെയും സംഘാടകർ ഹാർദ്ദവമായി സ്വാഗതം ചെയ്യുന്നു.

പെരുന്നാൾ ആഘോഷങ്ങൾ വികാരി റവ. ഫാ. ഡോ. ഐസക് ബി. പ്രകാശ്, സഹവികാരിമാരായ റവ. ഫാ. ജോൺസൺ പുഞ്ചക്കോണം, റവ. ഫാ. ടെജി എബ്രഹാം, ട്രസ്റ്റി ശ്രീ. തോമസ് പണിക്കർ, സെക്രട്ടറി ശ്രീ. മനോജ് മാത്യു, മാനേജിങ് കമ്മിറ്റി, വിവിധ ആത്മീയ സംഘടനകൾ, പെരുന്നാൾ കൺവീനർമാരായ മിസ്റ്റർ ജിജോ കാവനാൽ, മിസ്റ്റർ മത്തായി കുര്യൻ, മിസ്റ്റർ വിനു കുര്യൻ, മിസ്റ്റർ പേൾ വർഗ്ഗീസ് . എന്നിവരുടെ നേതൃത്വത്തിൽ വിവിധ കമ്മറ്റികൾ പ്രവർത്തിച്ച് വരുന്നു.

St. Thomas Orthodox Cathedral

2411 5th Street, Stafford, Texas 77477