ലക്ഷ്യം പാർലമെന്റ് മാർച്ച്; പരാജയപ്പെട്ടാൽ ‘പ്രേതമായി തിരിച്ചുവരു’മെന്ന് സോനം വാങ്ചുക്

ന്യൂഡൽഹി: പ്രമുഖ പരിസ്ഥിതി പ്രവർത്തകനും വിദ്യാഭ്യാസ പ്രവർത്തകനുമായ സോനം വാങ്ചുക് ഡൽഹി ജന്തർ മന്തറിൽ നടത്തുന്ന അനിശ്ചിതകാല നിരാഹാര സമരം ഇരുപതാം ദിവസത്തിലേക്ക് കടന്നു. ജൂലായ് 20-ന് നടക്കുന്ന പാർലമെന്റ് മാർച്ചിൽ പങ്കെടുക്കാനായി താൻ എങ്ങനെയെങ്കിലും ജീവനോടെയിരിക്കുമെന്നും, ഒരുപക്ഷേ ആ മുന്നേറ്റം പരാജയപ്പെട്ടാൽ താൻ ഒരു പ്രേതമായി മടങ്ങിവരുമെന്നും അദ്ദേഹം തന്റെ അനുയായികളോട് പറഞ്ഞു. ആരോഗ്യം വഷളായിക്കൊണ്ടിരിക്കുന്ന സാഹചര്യത്തിൽ സമരം അവസാനിപ്പിക്കാൻ വിവിധ മേഖലകളിൽ നിന്നുള്ളവർ ആവശ്യപ്പെടുന്നുണ്ടെങ്കിലും തന്റെ ലക്ഷ്യം പൂർത്തീകരിക്കുന്നത് വരെ പിന്നോട്ടില്ലെന്ന നിലപാടിലാണ് അദ്ദേഹം.

കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജിവെക്കണമെന്നും വിദ്യാഭ്യാസ മേഖലയിലെ ക്രമക്കേടുകൾ പരിഹരിക്കണമെന്നും ആവശ്യപ്പെട്ടാണ് വാങ്ചുക് സമരം നടത്തുന്നത്. കോക്രോച്ച് ജനതാ പാർട്ടി (സിജെപി)യുടെ നേതൃത്വത്തിൽ നടത്തുന്ന പ്രതിഷേധം ഇപ്പോൾ 28-ാം ദിവസത്തിലേക്ക് എത്തിയിരിക്കുകയാണ്. സമരത്തിന്റെ അടുത്ത നിർണ്ണായക ഘട്ടമാണ് ജൂലായ് 20-ന് നടത്തുന്ന ‘സൻസദ് ചലോ’ പാർലമെന്റ് മാർച്ച്.

നിരാഹാര സമരം മൂന്നാം വാരത്തിലേക്ക് കടന്നതോടെ വാങ്ചുകിന്റെ ആരോഗ്യനില അതീവ ഗുരുതരമായി തുടരുകയാണ്. കഴിഞ്ഞ 24 മണിക്കൂറിനുള്ളിൽ 500 ഗ്രാം തൂക്കം കുറഞ്ഞ അദ്ദേഹത്തിന്റെ ആകെ ശരീരഭാരം 56.65 കിലോഗ്രാമായി കുറഞ്ഞു. സമരം തുടങ്ങിയതിന് ശേഷം ഏകദേശം 9 കിലോയിലധികം ഭാരമാണ് അദ്ദേഹത്തിന് നഷ്ടപ്പെട്ടത്. നിലവിൽ അദ്ദേഹത്തിന്റെ രക്തസമ്മർദ്ദം 105/61 mmHg ഉം രക്തത്തിലെ പഞ്ചസാരയുടെ അളവ് 80 mg/dL ഉം ആണ്. അദ്ദേഹത്തിന്റെ ആരോഗ്യനില ദിവസേന നിരീക്ഷിക്കാനും ആവശ്യമെങ്കിൽ വൈദ്യസഹായം നൽകാനും ഡൽഹി ഹൈക്കോടതി കേന്ദ്ര സർക്കാരിന് നിർദ്ദേശം നൽകിയിട്ടുണ്ട്.

തന്റെ നിരാഹാരം അവസാനിപ്പിക്കാൻ ആരും ആവശ്യപ്പെടേണ്ടതില്ലെന്നും പകരം ജൂലൈ 20-ലെ സമാധാനപരമായ മാർച്ചിൽ പങ്കുചേരണമെന്നും വാങ്ചുക് വീഡിയോ സന്ദേശത്തിലൂടെ ആവശ്യപ്പെട്ടു. താൻ ശാരീരികമായി ദുർബലനാണെങ്കിലും ആന്തരികമായി കരുത്തനാണെന്നും ജനാധിപത്യത്തിന്റെ ശ്രീകോവിലിൽ തങ്ങളുടെ അപേക്ഷ സമർപ്പിക്കുമെന്നും അദ്ദേഹം വ്യക്തമാക്കി. സഹതാപത്തേക്കാൾ ഉപരിയായി ജനങ്ങളുടെ സജീവമായ പങ്കാളിത്തമാണ് ഇപ്പോൾ ആവശ്യമെന്നും അദ്ദേഹം കൂട്ടിച്ചേർത്തു.