പന്ത്രണ്ടാമത് സിറോ-മലങ്കര കത്തോലിക്ക ഫാമിലി കൺവെൻഷന് വിശ്വാസത്തോടും ആത്മീയ നവീകരണത്തോടും കൂടി തുടക്കമായി

ഡോ. ജോർജ് എം. കാക്കനാട്

ഡബിൾട്രീ ബൈ ഹിൽട്ടൺ (സ്റ്റാംഫോർഡ്, കണക്റ്റിക്കട്ട്) : യു.എസ്.എയിലെയും കാനഡയിലെയും പന്ത്രണ്ടാമത് സിറോ-മലങ്കര കത്തോലിക്ക ഫാമിലി കൺവെൻഷന് ആവേശത്തോടും ആഴമേറിയ ആത്മീയ ചൈതന്യത്തോടും കൂടി ഡബിൾട്രീ ബൈ ഹിൽട്ടൺ സ്റ്റാംഫോർഡിൽ തുടക്കമായി. അമേരിക്കയിലെയും കാനഡയിലെയും വിവിധ ഭാഗങ്ങളിൽ നിന്നുള്ള വൈദികരും സമർപ്പിതരും വിശ്വാസികളും സഭാ പിതാക്കന്മാരും സംഗമത്തിൽ പങ്കെടുത്തു.

“പിതാവിനെ ആത്മാവിലും സത്യത്തിലും ആരാധിക്കുക” (യോഹന്നാൻ 4:23) എന്ന ചിന്താവിഷയത്തെ ആസ്പദമാക്കി നടക്കുന്ന ഈ കൺവെൻഷൻ, സഭയുടെ ആരാധനാക്രമ വർഷത്തെയും സിറോ-മലങ്കര കത്തോലിക്ക കുടുംബത്തിന്റെ ഐക്യത്തെയും ആഘോഷമാക്കുന്നതായിരുന്നു.

യു.എസ്.എയിലെയും കാനഡയിലെയും സെന്റ് മേരി ക്വീൻ ഓഫ് പീസ് ഭദ്രാസനത്തിന്റെ അധ്യക്ഷൻ അഭിവന്ദ്യ ഫിലിപ്പോസ് മാർ സ്റ്റെഫാനോസ് മെത്രാപ്പോലീത്തായുടെ സ്വാഗതപ്രസംഗത്തോടെയാണ് ഉദ്ഘാടന സമ്മേളനം ആരംഭിച്ചത്.

വടക്കേ അമേരിക്കയിലെ സഭയുടെ ചരിത്രപരമായ വളർച്ചയെ അനുസ്മരിച്ചുകൊണ്ട്, 1948-ൽ ദൈവദാസൻ മാർ ഈവാനിയോസ് തിരുമേനി അമേരിക്ക സന്ദർശിച്ചതാണ് ഈ മണ്ണിൽ സഭയുടെ വിത്തുപാകിയതെന്ന് മാർ സ്റ്റെഫാനോസ് പിതാവ് ഓർമ്മിപ്പിച്ചു. 1984-ൽ ആദ്യതലമുറ കുടിയേറ്റക്കാരുടെ ത്യാഗത്തിലൂടെ വളർന്ന സമൂഹം, ദൈവപരിപാലനയാൽ 2010-ൽ എക്‌സാർക്കേറ്റായും 2016-ൽ ഭദ്രാസനമായും ഉയർത്തപ്പെട്ടു.

“നമ്മുടെ ഭദ്രാസനം ഭൂമിശാസ്ത്രപരമായി ഏറ്റവും വലിയ ഒന്നാണ്. വിശാലമായ ദൂരങ്ങളിൽ കുടുംബങ്ങൾ ചിതറിക്കിടക്കുന്നതിനാൽ എല്ലാവരും ഒന്നിച്ചുകൂടാനുള്ള അവസരങ്ങൾ അപൂർവ്വമാണ്; അതുകൊണ്ടാണ് ഈ ഫാമിലി കൺവെൻഷൻ അത്രമേൽ പ്രധാനപ്പെട്ടതാകുന്നത്.” മാർ സ്റ്റെഫാനോസ് പറഞ്ഞു. “നമ്മുടെ ശക്തി എണ്ണത്തിലല്ല, മറിച്ച് ക്രിസ്തുവിലുള്ള അചഞ്ചലമായ വിശ്വാസത്തിലാണ് അളക്കപ്പെടുന്നത്. വടക്കേ അമേരിക്കയിലുടനീളം സജീവമായ ആരാധനാക്രമ ജീവിതം, വിശ്വാസ പരിശീലനം, യുവജന-കുടുംബ ശുശ്രൂഷകൾ, കാരുണ്യ പ്രവർത്തനങ്ങൾ എന്നിവയിലൂടെ നമ്മുടെ സഭ നിരന്തരം തഴച്ചുവളരുകയാണ്.”

ചടങ്ങിലെ വിശിഷ്ടാതിഥികളെയും അഭിവന്ദ്യ പിതാക്കന്മാരെയും മാർ സ്റ്റെഫാനോസ് പ്രത്യേകം സ്വാഗതം ചെയ്തു. ഭദ്രാസനത്തിന്റെ രൂപീകരണത്തിലും വളർച്ചയിലും അപ്പോസ്തോലിക് വിസിറ്റേറ്റർ എന്ന നിലയിൽ വലിയ പങ്കുവഹിച്ച അഭിവന്ദ്യ ജോസഫ് മാർ തോമസ് മെത്രാപ്പോലീത്തായുടെ സാന്നിധ്യം ഈ ചടങ്ങിന് വലിയ ആദരവാണ് നൽകുന്നതെന്ന് അദ്ദേഹം പറഞ്ഞു. ആരോഗ്യപ്രശ്നങ്ങളും വരാനിരിക്കുന്ന പുനരൈക്യദിന ആഘോഷങ്ങളുടെ തിരക്കുകളും മാറ്റിവെച്ച് പങ്കെടുത്ത പൂനെ ഭദ്രാസനാധ്യക്ഷൻ അഭിവന്ദ്യ മാത്യൂസ് മാർ പക്കോമിയോസ് തിരുമേനിയെയും, മെത്രാഭിഷേകത്തിന് ശേഷം ആദ്യമായി യു.എസ്.എ സന്ദർശിക്കുന്ന യു.കെ-യൂറോപ്പ് അപ്പോസ്തോലിക് വിസിറ്റേറ്റർ അഭിവന്ദ്യ കുറിയാക്കോസ് മാർ ഒസ്താത്തിയോസ് തിരുമേനിയെയും അദ്ദേഹം സ്നേഹത്തോടെ സ്വാഗതം ചെയ്തു.

ഇവർക്ക് പുറമെ, മലങ്കര മേജർ സെമിനാരി ഡീനും പ്രശസ്ത ദൈവശാസ്ത്രജ്ഞനുമായ റവ. ഡോ. ജോളി ഫിലിപ്പ് കരിമ്പിൽ, വികാരി ജനറാൾ വെരി റവ. അഗസ്റ്റിൻ മംഗളത്ത് കോറെപ്പിസ്കോപ്പ, മോൺസിഞ്ഞോർ പീറ്റർ കൊച്ചേരി, ജനറൽ കൺവീനറും ചാൻസലറുമായ റവ. ഫാ. സാജി മുക്കൂട്ടുമണ്ണിൽ, പാസ്റ്ററൽ കൗൺസിൽ സെക്രട്ടറി റിൻസി ബേബി, എം.സി.വൈ.എം പ്രസിഡന്റ് സിന്ധ്യ, വടക്കേ അമേരിക്കയിലെ വിവിധ ഇടവകകളിൽ നിന്നുള്ള വൈദികർ, കന്യാസ്ത്രീകൾ, പ്രതിനിധികൾ, വിശ്വാസികൾ എന്നിവരെയും പിതാവ് ചടങ്ങിലേക്ക് ഹൃദ്യമായി സ്വാഗതം ചെയ്തു. തന്റെ ഉദ്ഘാടന സന്ദേശത്തിൽ, സഭാതലവൻ മോറാൻ മോർ ബസേലിയോസ് കർദിനാൾ ക്ലീമിസ് കാതോലിക്കാ ബാവയുടെ അസാന്നിധ്യത്തെ കുറിച്ച് മാർ സ്റ്റെഫാനോസ് വിശദീകരിച്ചു. കൺവെൻഷനിൽ പങ്കെടുക്കാൻ ബാവ തിരുമേനി ഏറെ ആഗ്രഹിച്ചിരുന്നെങ്കിലും, മധ്യപൂർവേഷ്യയിലെ പ്രതിസന്ധികളും വിമാന സർവീസുകൾ റദ്ദാക്കിയതും മൂലം അദ്ദേഹത്തിന് എത്തുവാൻ സാധിച്ചില്ലെന്ന് അദ്ദേഹം അറിയിച്ചു. ബാവ തിരുമേനിയുടെ സ്നേഹം നിറഞ്ഞ ആശംസകളും പ്രാർത്ഥനകളും കൺവെൻഷന് ഒപ്പമുണ്ടെന്നും അദ്ദേഹം കൂട്ടിച്ചേർത്തു.

ബത്തേരി ഭദ്രാസനാധ്യക്ഷൻ അഭിവന്ദ്യ ജോസഫ് മാർ തോമസ് മെത്രാപ്പോലീത്ത ഉദ്ഘാടന പ്രസംഗം നടത്തി. കൺവെൻഷനെ ഒരു വിശുദ്ധ തീർത്ഥാടനമായും ക്രിസ്തുവിലുള്ള കൂട്ടായ്മയുടെ ആഘോഷമായും അദ്ദേഹം വിശേഷിപ്പിച്ചു.

“നന്ദി നിറഞ്ഞ ഹൃദയത്തോടെയാണ് നമ്മൾ ഇവിടെ ഒന്നിച്ചുകൂടിയിരിക്കുന്നത്,” മാർ തോമസ് പറഞ്ഞു. “വിശുദ്ധ കുർബാന ഒരു ആഘോഷം മാത്രമല്ല, വടക്കേ അമേരിക്കയിൽ ക്രിസ്തുവിന്റെ സാക്ഷികളാകാൻ നമ്മെ പ്രാപ്തരാക്കുന്ന ജീവനുള്ള കണ്ടുമുട്ടൽ കൂടിയാണ്.”
ആരാധനാക്രമ വർഷത്തെക്കുറിച്ച് പരാമർശിച്ച അദ്ദേഹം, സത്യാരാധന എപ്പോഴും യഥാർത്ഥ ക്രിസ്തീയ സാക്ഷ്യത്തിലേക്ക് നയിക്കണമെന്ന് ഓർമ്മിപ്പിച്ചു. സഭയുടെ ആരാധനാക്രമ പാരമ്പര്യങ്ങൾ മാത്രമല്ല, അതിന്റെ ദൈവശാസ്ത്രവും ആത്മീയതയും ക്രിസ്തുവുമായുള്ള വ്യക്തിപരമായ അനുഭവവും കാത്തുസൂക്ഷിക്കാൻ അദ്ദേഹം വിശ്വാസികളോട് ആഹ്വാനം ചെയ്തു. ശമറിയാക്കാരിയുമായുള്ള സുവിശേഷ സംഭവം ചൂണ്ടിക്കാണിച്ചുകൊണ്ട്, വിശുദ്ധ കുർബാനയിൽ ക്രിസ്തുവിനെ അനുഭവിച്ചറിഞ്ഞ ശേഷം അവിടുത്തെ സന്തോഷമുള്ള സാക്ഷികളാകാൻ അദ്ദേഹം ഏവരെയും ഓർമ്മിപ്പിച്ചു.

ആരാധനാക്രമം കേവലം ചടങ്ങുകളല്ല, മറിച്ച് ദൈവവും അവിടുത്തെ ജനവും തമ്മിലുള്ള ജീവനുള്ള കണ്ടുമുട്ടലാണ്. ഓരോ വിശുദ്ധ കുർബാന ആഘോഷത്തിലും സ്വർഗ്ഗം ഭൂമിയെ സ്പർശിക്കുകയും ക്രിസ്തു തന്റെ ശരീരരക്തങ്ങളാൽ നമ്മെ പോറ്റുകയും ചെയ്യുന്നു. മലങ്കര കത്തോലിക്കാ തനിമയുടെ ഹൃദയം ആരാധനാക്രമ ആത്മീയതയാണ് എന്നും അദ്ദേഹം ഓർമിപ്പിച്ചു.

മാതൃരാജ്യത്തുനിന്ന് ഏറെ അകലെ പുതിയ സംസ്‌കാരങ്ങളിലും തൊഴിലുകളിലും ജീവിക്കുമ്പോഴും മലങ്കര കത്തോലിക്കരെന്ന തനിമ നിലനിർത്തുന്നത് നമ്മുടെ ആരാധനയിലൂടെയാണ്. അത് നമ്മുടെ ഭാഷയെയും പാരമ്പര്യത്തെയും മാത്രമല്ല, ദൈവശാസ്ത്രത്തെയും ദൈവാനുഭവത്തെയും സംരക്ഷിക്കുന്നു. ആദ്യത്തെ സഭ കുടുംബമാണ്; അതിനാൽ ഓരോ ഭവനവും പ്രാർത്ഥനാകേന്ദ്രമാകണം. സഭയുടെ ഭാവിയായ യുവജനങ്ങൾ ആരാധനാക്രമത്തെ പഴയതായി കാണാതെ അതിന്റെ സൗന്ദര്യം കണ്ടെത്തുകയും ഇടവക ജീവിതത്തിലും മദ്ബഹാ ശുശ്രൂഷകളിലും സജീവമാകുകയും വേണം എന്നും തിരുമേനി ആവശ്യപ്പെട്ടു.
നാം പൂർണ്ണഹൃദയത്തോടെ ദൈവത്തെ ആരാധിക്കുന്നുണ്ടോ എന്നും, ക്രിസ്തു നമ്മുടെ കുടുംബത്തിന്റെ കേന്ദ്രമാണോ എന്നും സ്വയം ചോദിച്ചുകൊണ്ട് ഈ കൺവെൻഷൻ ആത്മീയ നവീകരണത്തിന്റെയും സന്തോഷകരമായ കൂട്ടായ്മയുടെയും വേളയായി മാറട്ടെയെന്ന് തിരുമേനി ആശംസിച്ചു.

ക്രിസ്തുവിനെ ലോകത്തിന്റെ വെളിച്ചമായി പ്രതീകവത്കരിച്ചുകൊണ്ടും കൺവെൻഷനിൽ ദൈവാനുഗ്രഹം യാചിച്ചുകൊണ്ടും പരമ്പരാഗത ഭദ്രദീപം തെളിയിക്കൽ ചടങ്ങും ഉദ്ഘാടന വേളയിൽ നടന്നു.

ആശംസകൾ അർപ്പിച്ചുകൊണ്ട് സംസാരിച്ച പാസ്റ്ററൽ കൗൺസിൽ സെക്രട്ടറി റിൻസി ബേബി, ഈ കൺവെൻഷൻ ഒരു കൂട്ടായ്മ എന്നതിലുപരി വിശ്വാസത്തിൽ ഒന്നിച്ച സിറോ-മലങ്കര കത്തോലിക്ക കുടുംബത്തിന്റെ ആഘോഷമാണിതെന്ന് പറഞ്ഞു. സഭയുടെ വളർച്ചയെ കടുക് മണിയുടെ ഉപമയോട് ഉപമിച്ച അവർ, ഈ കൺവെൻഷൻ സഭയുടെ വിശ്വാസവും പാരമ്പര്യവും അടുത്ത തലമുറയിലേക്ക് കൈമാറുന്നതിൽ പ്രധാന പങ്കുവഹിക്കുന്നുണ്ടെന്ന് എടുത്തുപറഞ്ഞു. തുടർന്ന് റവ. ഫാ. സാജി മുക്കൂട്ടുമണ്ണിൽ അമേരിക്കയിലെയും കാനഡയിലെയും വിവിധ ഇടവകകളെയും മിഷനുകളെയും സദസ്സിന് പരിചയപ്പെടുത്തി.
വികാരി ജനറാൾ വെരി റവ. അഗസ്റ്റിൻ മംഗളത്ത് കോറെപ്പിസ്കോപ്പയുടെ കൃതജ്ഞതാ പ്രകടനത്തോടെ ഉദ്ഘാടന ചടങ്ങുകൾ സമാപിച്ചു. കൺവെൻഷൻ സാക്ഷാത്കരിക്കാൻ പ്രയത്നിച്ച ബിഷപ്പുമാർ, വൈദികർ, സമർപ്പിതർ, സന്നദ്ധപ്രവർത്തകർ, സ്പോൺസർമാർ, ഭാരവാഹികൾ, വിശ്വാസികൾ എന്നിവർക്ക് അദ്ദേഹം നന്ദി രേഖപ്പെടുത്തി.

പ്രാർത്ഥനയുടെയും നന്ദിയുടെയും ഐക്യത്തിന്റെയും അന്തരീക്ഷത്തിലാണ് ആദ്യദിനം അവസാനിച്ചത്. വടക്കേ അമേരിക്കയിലുടനീളമുള്ള സിറോ-മലങ്കര കത്തോലിക്ക കുടുംബങ്ങൾക്കായി ദിനപൂജകൾ, വിശ്വാസ പരിശീലനം, യുവജന പരിപാടികൾ, സാംസ്കാരിക സന്ധ്യകൾ, കൂട്ടായ്മകൾ എന്നിവയടങ്ങിയ വരും ദിനങ്ങളിലെ ആത്മീയ സംഗമത്തിന് ഇത് മികച്ച തുടക്കമേകി.