രാജൂ തരകൻ
ഡാളസ്, ടെക്സാസ് -മാർച്ച്-18: ഡാളസ് പട്ടണത്തിലെ മലയാളി പെന്തക്കോസ്തൽ സഭകളുടെ ഐക്യവേദിയായ ഡാളസ് സിറ്റി-വൈഡ് ഫെലോഷിപ്പി(DCF)-ന്റെ പ്രവർത്തനോൽഘാടനം 2026 മാർച്ച് 14 ശനിയാഴ്ച രാവിലെ 10:00 മുതൽ 12:30 വരെ, ശാരോൻ ഫെലോഷിപ്പ് സഭയിൽ വച്ച് ഡാളസ് പട്ടണത്തിലെ സഭാ ശുശ്രൂഷകന്മാരുടെയും വിശ്വാസ സമൂഹത്തിന്റെയും സാന്നിദ്ധ്യത്തിൽ നടന്നു.
“ദൈവരാജ്യത്തിനായി ഐക്യപ്പെടുക” എന്നതായിരുന്നു സെമിനാറിന്റെ മുഖ്യ വിഷയം. കഴിഞ്ഞ ചില വർഷങ്ങളായി സിറ്റി-വൈഡിന് നേതൃത്വം നൽകിയ പാസ്റ്റർ മാത്യു ശാമുവലായിരുന്നു യോഗത്തിന് അദ്ധ്യക്ഷം വഹിച്ചത്. ഡാളസ് പട്ടണത്തിലെ സഭകളെ ഒരു കുടക്കീഴിൽ നിർത്തുവാൻ ഡാളസ് സിറ്റി-വൈഡിന് കഴിഞ്ഞകാലങ്ങളിൽ നേതൃത്വം നൽകിയ നേതൃത്വത്തെയും കഴിഞ്ഞ നാൽപ്പത് വർഷമായി ചെയ്തുവരുന്ന പ്രവർത്തനങ്ങളെക്കുറിച്ചും അദ്ദേഹം എടുത്തുപറയുകയുണ്ടായി.
തുടർന്ന് DCF-ന്റെ ചെയർമാനായി ഈ വർഷം ചുമതലയേറ്റ പാസ്റ്റർ തോമസ് മുല്ലയ്ക്കൽ ഉദ്ഘാടന പ്രസംഗം നടത്തുകയുണ്ടായി. കഴിഞ്ഞ രണ്ടു മാസത്തിനുള്ളിൽ സംഘടനാപരമായി ചെയ്ത പ്രവർത്തനങ്ങളെക്കുറിച്ച് താൻ വിവരിക്കുകയുണ്ടായി. ആദ്യമായി DCF ടെക്സസിൽ രജിസ്റ്റർ ചെയ്തതും ക്രമീകൃതമായ പ്രവർത്തനങ്ങൾക്കായി 11 അംഗ കമ്മറ്റിയെ തിരഞ്ഞെടുത്തതും ഈ വർഷത്തെ വിവിധ പ്രവർത്തനങ്ങളെ പരിചയപ്പെടുത്തിയതും വലിയ ആവേശത്തോടെയാണ് തിങ്ങിനിറഞ്ഞ സദസ്സ് ഏറ്റെടുത്തത്.
പാസ്റ്റർ സ്റ്റീഫൻ വർഗീസ് “ക്രിസ്തുവിൽ നാം ആരാണ്” എന്ന വിഷയത്തെ ആധാരമാക്കി ഐക്യത എന്താണെന്നും അത് നമ്മുടെ സമൂഹത്തിൽ ഉണ്ടാക്കേണ്ട ചലനങ്ങൾ എന്താണെന്നും താൻ വിവരിച്ചു. ഒരേ വിശ്വാസം പുലർത്തുന്ന സഭകൾ ഒരുമിച്ചുനിൽക്കുമ്പോൾ അത് ഒരു ആത്മീയമായ ഒരു മാറ്റത്തിലേക്ക് നയിക്കേണം എന്ന ആഹ്വാനം അദ്ദേഹം നൽകുകയുണ്ടായി. തുടർന്ന് സിറ്റിവൈഡ് കോ-ചെയർമാനും കൗൺസിലിങ് രംഗത്ത് വിശ്വാസസമൂഹത്തിൽ പ്രശസ്തനുമായ ഡോ. തോമസ് ഇടിക്കുള, “നമുക്ക് ഒരുമിച്ച് ചെയ്യാനാകുന്നത് എന്ത്” എന്ന വിഷയത്തിൽ നടത്തിയ പ്രഭാഷണം കേഴ്വിക്കാർക്ക് പുതിയ ഒരു അനുഭവമായി. ചരിത്രത്തിലെ ഏതൊരു ആത്മീയ ഉണർവ്വിന്റെയും പിന്നിൽ ഐക്യത ഒരു അനിവാര്യഘടകമായിരുന്നു എന്ന് വിവിധ സ്റ്റാറ്റിസ്റ്റിക്കുകൾ ചൂണ്ടിക്കാട്ടി താൻ വ്യക്തമാക്കുകയുണ്ടായി.
ഷാരോൺ മാത്യു, ബ്ലെസ്സൻ എന്നിവരുടെ നേതൃത്വത്തിൽ ഷാരോൺ ചർച്ച് ക്വയർ ജനത്തെ ആരാധനയുടെ അനുഭവത്തിലേക്ക് നയിക്കുകയുണ്ടായി. മ്യൂസിക് കോർഡിനേറ്റർ ജോസ്പ്രകാശ് കരിമ്പിനേത്ത് ആലപിച്ച മനോഹരമായ ഗാനവും പാസ്റ്റർ വി ടി സാംകുട്ടി, പാസ്റ്റർ ചാക്കോ ജോർജ്ജ് എന്നിവരുടെ പ്രാർത്ഥനയും യോഗത്തിന് അനുഗ്രഹമായി.
എസ് പി ജെയിംസ് (സെക്രട്ടറി) അറിയിപ്പുകൾ നടത്തുകയും, തോമസ് ചെല്ലേത്ത് (ട്രെഷററാർ) നന്ദി അറിയിക്കുകയും ചെയ്തു. പാസ്റ്റർ ജോൺസൺ സഖറിയായുടെ പ്രാർത്ഥനാശിർവാദങ്ങളോടെ സമാപിച്ച യോഗത്തിന് ജോസ് പ്രകാശ് കരിമ്പിനേത്ത് (മ്യൂസിക് കോ-ഓർഡിനേറ്റർ) അന്നമ്മ വില്യംസ് (സിസ്റ്റേഴ്സ് കോ-ഓർഡിനേറ്റർ), രാജു തരകൻ (മീഡിയ കോ-ഓർഡിനേറ്റർ) എന്നിവരെ കൂടാതെ പാസ്റ്റർ മാത്യു ശാമുവേൽ, പാസ്റ്റർ എബ്രഹാം തോമസ്, ഷാജി മണിയാറ്റ് , വർഗ്ഗീസ് വർഗ്ഗീസ് എന്നിവർ നേതൃത്വം നൽകുകയുണ്ടായി. കൂടുതൽ വിവരങ്ങൾക്ക് സന്ദർശിക്കുക: DallasCitywide. org
