അജു വാരിക്കാട്
ഹൂസ്റ്റൺ: ഗ്രേറ്റർ ഹൂസ്റ്റൺ മലയാളി അസോസിയേഷന്റെ (MAGH) 2026-ലേക്കുള്ള ഭരണസമിതി തിരഞ്ഞെടുപ്പിൽ, റോയ് മാത്യു നയിക്കുന്ന ‘ടീം യുണൈറ്റഡ്’ (Team United) പാനലിൽ നിന്ന് പ്രമുഖ കായിക-സാംസ്കാരിക സംഘാടകനായ സാജൻ ജോൺ ജനവിധി തേടുന്നു.
മാഗ്, ഒരുമ (ORUMA), ഫോമാ (FOMAA), ഇയാനാഗ് (IANAGH) എന്നീ സംഘടനകളിൽ 2015 മുതൽ സജീവ അംഗമാണ് സജൻ ജോൺ. ഹാരിസ് ഹെൽത്ത് സിസ്റ്റത്തിൽ ലീഡ് ട്രാൻസ്ഫർ സെന്റർ നഴ്സ്/കേസ് മാനേജരായി സേവനമനുഷ്ഠിക്കുന്ന അദ്ദേഹം, സാമൂഹ്യ പ്രവർത്തനങ്ങളിലും മുന്നിട്ട് നിൽക്കുന്നു.
ഇമ്മാനുവേൽ മാർത്തോമ്മാ ചർച്ച് യൂത്ത് സെക്രട്ടറിയായി (2023) പ്രവർത്തിച്ചിട്ടുണ്ട്. സ്റ്റാർസ് ഓഫ് ഹൂസ്റ്റൺ ക്രിക്കറ്റ് ക്ലബ്ബിന്റെ സ്ഥാപകാംഗവും വൈസ് പ്രസിഡന്റുമാണ്. ഫോമയുടെ സൗത്തേൺ റീജിയൻ സ്പോർട്സ് കോർഡിനേറ്ററായി (2025) സേവനമനുഷ്ഠിക്കുന്ന അദ്ദേഹം, കായിക രംഗത്തെ സംഘാടക മികവ് തെളിയിച്ചിട്ടുണ്ട്. കൂടാതെ, വിഷ്വൽ ആർട്ടിസ്റ്റ് എന്ന നിലയിൽ വിവിധ ചാരിറ്റി പ്രവർത്തനങ്ങൾക്കായി ഫണ്ട് ശേഖരണത്തെയും സജൻ ജോൺ പിന്തുണയ്ക്കുന്നു.
കോട്ടാരക്കര സെന്റ് ഗ്രിഗോറിയോസ് കോളേജ് മാഗസിൻ എഡിറ്ററായും (2003-2004) പ്രവർത്തിച്ച സാജൻ ജോൺ, മാന്യമായ പെരുമാറ്റവും, പിന്തുണ നൽകുന്ന സ്വഭാവവും, ശാന്തമായ വ്യക്തിത്വവും കൊണ്ട് ശ്രദ്ധേയനാണ്.
തിരഞ്ഞെടുപ്പ് വിവരങ്ങൾ: റോയ് മാത്യു (പ്രസിഡന്റ്), ക്ലാരമ്മ മാത്യൂസ് (ട്രസ്റ്റി ബോർഡ്) എന്നിവർ നേതൃത്വം നൽകുന്ന പാനലിൽ വിനോദ് ചെറിയാൻ, സന്തോഷ് ആറ്റുപുറം, ജിൻസ് മാത്യു, അനില സന്ദീപ്, സുനിൽ തങ്കപ്പൻ, ഷിനു എബ്രഹാം തുടങ്ങി പ്രഗത്ഭർ അണിനിരക്കുന്നു. 2025 ഡിസംബർ 13-ന് ശനിയാഴ്ച സ്റ്റാഫോർഡ് സെന്റ് തോമസ് ഓർത്തഡോക്സ് ചർച്ച് ഹാളിൽ (2411 5th St, Stafford, TX 77477) വെച്ചാണ് തിരഞ്ഞെടുപ്പ് നടക്കുന്നത്.
