നാസയുടെ ബഹിരാകാശ സഞ്ചാരി ഫ്രാങ്ക് റൂബിയോ ദൗത്യം പൂർത്തിയാക്കി ഭൂമിയിലേക്ക് മടങ്ങുന്നു. ഏറ്റവും ദൈർഘ്യമേറിയ ബഹിരാകാശ യാത്ര പൂർത്തിയാക്കി തിരികെ ഭൂമിയിലേക്ക് മടങ്ങുന്ന അമേരിക്കൻ വംശജനാണ് ഇദ്ദേഹം. ഇന്ന് ഭൂമിയിലേക്കുള്ള യാത്ര തിരിക്കും. 371 ദിവസത്തെ ദൗത്യം പൂർത്തിയാക്കിയാണ് ക്രൂ അംഗങ്ങൾ തിരിക്കുന്നത്.
റൂബിയോ, റോസ്‌കോസ്‌മോസ് ബഹിരാകാശ യാത്രികരായ സെർജി പ്രോകോപിയേവ്, ദിമിത്രി പെറ്റെലിൻ എന്നിവർക്കൊപ്പം സോയൂസ് എംഎസ്-23 ബഹിരാകാശ പേടകം അന്താരാഷ്‌ട്ര ബഹിരാകാശ നിലയത്തിൽ നിന്നും പുറപ്പെടും. മൂവർ സംഘത്തിന്റെ ബഹിരാകാശ യാത്ര 157.4 ദശലക്ഷം മൈലുകൾക്ക് പുറമെ ഭൂമിയുടെ 5,963 ഭ്രമണപഥങ്ങളും കഴിഞ്ഞാണ് ലക്ഷ്യത്തിലെത്തിയത്.
അൺഡോക്ക് ചെയ്ത് മൂന്ന് മണിക്കൂറിനുള്ളിൽ ക്രൂ അംഗങ്ങൾ കസാക്കിസ്ഥാന്റെ സ്‌റ്റെപ്പിയിൽ ഇറങ്ങും. ലാൻഡിംഗിന് പിന്നാലെ ക്രൂ അംഗങ്ങളെ കസാക്കിസ്ഥാനിലെ കരഗണ്ടിയിലേക്കാകും കൊണ്ടുപോകുക. ഇവിടെ നിന്നാകും റൂബിയോ യുഎസിലേക്ക് യാത്ര തിരിക്കുക. റൂബിയോയുടെ ചരിത്രത്തിൽ ഇടം നേടിയ ബഹിരാകാശ യാത്ര ആരംഭിക്കുന്നത് 2022 സെപ്റ്റംബർ 21-നാണ്. സെപ്റ്റംബർ 11-ന് മുൻ യുഎസ് റെക്കോർഡുകളെല്ലാം അദ്ദേഹം തകർത്തു.
നാസ ബഹിരാകാശ യാത്രികൻ മാർക്ക് വന്ദേ ഹെയ്‌ക്കിന്റെ റെക്കോർഡാണ് തകർത്തത്. 355 ദിവസമാണ് വന്ദേ ഹേയ് ബഹിരാകാശ നിലയത്തിൽ കഴിഞ്ഞത്. റൂബിയോയുടെയും മറ്റ് ക്രൂ അംഗങ്ങളുടെയും മടങ്ങിവരവ് 2023 മാർച്ചിലായിരുന്നു ആദ്യ ഘട്ടത്തിൽ ഷെഡ്യൂൾ ചെയ്തിരുന്നത്. എന്നാൽ സോയൂസ് എംഎസ്-22 ബഹിരാകാശ പേടകത്തിലെ സാങ്കേതിക പ്രശ്‌നങ്ങൾ കാരണം ദൗത്യം നീളുകയായിരുന്നു.
