ടൊറന്റോ: വിദ്യാഭ്യാസത്തിന് കാനഡയിലേക്ക് പോകുന്ന ചെലവ് ഇരട്ടിയിലേക്ക്. ഇമിഗ്രേഷന്‍, റെഫ്യൂജീസ് ആന്‍ഡ് സിറ്റിസണ്‍ഷിപ്പ് കാനഡ (ഐ ആര്‍ സി സി) പഠനാനുമതി അപേക്ഷകരുടെ ജീവിതച്ചെലവ് സാമ്പത്തിക ആവശ്യകതയില്‍ വര്‍ധനവ് പ്രഖ്യാപിച്ചതോടെയാണ് കാനഡയിലെ പഠനം ഭാരിച്ചതായി മാറുന്നത്. പുതിയ പ്രഖ്യാപനം 2024 ജനുവരി ഒന്നിനാണ് പ്രാബല്യത്തില്‍ വരിക.
2000-ാം ആണ്ടിന്റെ തുടക്കം മുതല്‍ അപേക്ഷകരുടെ ജീവിതച്ചെലവ് പതിനായിരം ഡോളറായാണ് നിജപ്പെടുത്തിയിരുന്നത്. അതാണ് ഇപ്പോള്‍ വര്‍ധിപ്പിച്ചിരിക്കുന്നത്.
ഓരോ വര്‍ഷവും ജീവിതച്ചെലവില്‍ വര്‍ധനവ് വരുന്നത് വിദ്യാര്‍ഥികള്‍ക്ക് വെല്ലുവിളിയായിരുന്നു. 2024 മുതല്‍ അപേക്ഷകന്‍ ആദ്യവര്‍ഷത്തെ ട്യൂഷനും യാത്രാ ചെലവുകളും വഹിക്കുന്നതിനു പുറമേ കുറഞ്ഞ വരുമാനമുള്ള കട്ട്-ഓഫിന്റെ 75 ശതമാനമായ 20,635 ഡോളര്‍ കാണിച്ചിരിക്കണം. 2024 ജനുവരി ഒന്നുമുതല്‍ ലഭിക്കുന്ന എല്ലാ പുതിയ പഠന അനുമതി അപേക്ഷകള്‍ക്കും ഈ മാറ്റം ബാധകമായിരിക്കും.
മുമ്പു കാലങ്ങളില്‍ അന്തര്‍ദേശീയ വിദ്യാര്‍ഥികള്‍ അഭിമുഖീകരിച്ച ദുര്‍ബലതയും ചൂഷണവും ഒഴിവാക്കാന്‍ സാമ്പത്തിക ക്രമീകരണങ്ങളുടെ ആവശ്യകത നിര്‍ബന്ധമാണെന്ന് ഇമിഗ്രേഷന്‍ മന്ത്രി മാര്‍ക്ക് മില്ലര്‍ പറഞ്ഞു. അന്തര്‍ദേശീയ വിദ്യാര്‍ഥികള്‍ നന്നായി തയ്യാറായി എത്തുന്നുവെന്ന് ഉറപ്പാക്കുന്നതാണ് ഇക്കാര്യമെന്നും അദ്ദേഹം വിശദീകരിച്ചു.
അന്തര്‍ദേശീയ വിദ്യാര്‍ഥികളെ ബാധിക്കുന്ന മൂന്ന് താത്ക്കാലിക നയങ്ങളെക്കുറിച്ചുള്ള വിവരങ്ങളും മില്ലര്‍ നല്‍കി. ക്ലാസ് നടക്കുന്ന സമയത്ത് വിദ്യാര്‍ഥികള്‍ക്ക് ആഴ്ചയില്‍ 20 മണിക്കൂറില്‍ കൂടുതല്‍ കാമ്പസിന് പുറത്ത് ജോലി ചെയ്യാന്‍ അനുവദിക്കുന്ന ഇളവ് 2024 ഏപ്രില്‍ 30 വരെ ദീര്‍ഘിപ്പിച്ചിട്ടുണ്ട്.
2024 സെപ്റ്റംബര്‍ ഒന്നിന് മുമ്പ് പഠന പരിപാടി ആരംഭിക്കുന്നവര്‍ക്ക് ബാധകമായ ഭാവി ബിരുദാനന്തര വര്‍ക്ക് പെര്‍മിറ്റിന്റെ ദൈര്‍ഘ്യത്തിലേക്ക് ഓണ്‍ലൈനായി പഠിക്കാന്‍ ചെലവഴിക്കുന്ന സമയം കണക്കാക്കാന്‍ വിദ്യാര്‍ഥികളെ അനുവദിക്കുന്ന നടപടിയും നീട്ടിയിട്ടുണ്ട്. എങ്കിലും 2023 ഡിസംബര്‍ 31 വരെ കാലഹരണപ്പെടുന്ന ബിരുദാനന്തര വര്‍ക്ക് പെര്‍മിറ്റ് ഉടമകള്‍ക്ക് അധിക 18 മാസത്തെ വര്‍ക്ക് പെര്‍മിറ്റ് നല്‍കുന്ന താത്ക്കാലിക നയം നീട്ടിയിട്ടില്ല.
കാനഡയില്‍ പഠിക്കുന്ന അന്തര്‍ദ്ദേശീയ വിദ്യാര്‍ഥികള്‍ക്ക് ഉയര്‍ന്ന നിലവാരമുള്ള സേവനങ്ങളും പാര്‍പ്പിടം ഉള്‍പ്പെടെയുള്ള പിന്തുണയും നല്‍കുന്ന പഠന സ്ഥാപനങ്ങളെ അംഗീകരിക്കുന്നതില്‍ ശ്രദ്ധ കേന്ദ്രീകരിക്കുന്നു. പഠന സ്ഥാപനങ്ങള്‍ അവര്‍ക്ക് വേണ്ടത്ര പിന്തുണ നല്‍കാന്‍ കഴിയുന്ന വിദ്യാര്‍ഥികളുടെ എണ്ണം മാത്രമേ സ്വീകരിക്കൂ എന്ന് പ്രതീക്ഷിക്കുന്നു.
സെപ്തംബര്‍ 2024 സെമസ്റ്ററിന് മുന്നോടിയായി, നിയുക്ത പഠന സ്ഥാപനങ്ങള്‍ മതിയായ വിദ്യാര്‍ഥി പിന്തുണ നല്‍കുന്നുണ്ടെന്ന് ഉറപ്പാക്കുന്നതിന് വിസകള്‍ പരിമിതപ്പെടുത്തുന്നത് ഉള്‍പ്പെടെ ആവശ്യമായ നടപടികള്‍ നടപ്പിലാക്കാന്‍ സര്‍ക്കാര്‍ പ്രതിജ്ഞാബദ്ധമാണ്.
ക്യൂബെക്ക് വിദ്യാഭ്യാസ സ്ഥാപനങ്ങളില്‍ പങ്കെടുക്കുന്ന അന്തര്‍ദ്ദേശീയ വിദ്യാര്‍ഥികള്‍ക്ക് ജീവിതച്ചെലവ് മാനദണ്ഡം സ്വതന്ത്രമായി സജ്ജമാക്കുകയും ഈ മാനദണ്ഡം സ്ഥിരമായി പരിഷ്‌കരിക്കുകയും ചെയ്യുന്നു.
