ഹൂസ്റ്റൺ : ഹൂസ്റ്റണിൽ അമ്മയെയും പിഞ്ചുകുഞ്ഞിനെയും മരിച്ച നിലയിൽ കണ്ടെത്തി. വെള്ളിയാഴ്ച പുലർച്ചെ 2:45 ഓടെ റിച്ച്‌മണ്ട് അവന്യൂവിലെ വെസ്റ്റ്‌ചേസ് അപ്പാർട്ട്‌മെന്റിലാണ് അമ്മയെയും (20) കുഞ്ഞിനെയും കണ്ടെത്തിയത്. സംഭവത്തിൽ കൊല്ലപ്പെട്ട യുവതിയുടെ സഹോദരനെ പൊലീസ് അറസ്റ്റ് ചെയ്തു.
അപ്പാർട്ട്‌മെന്റിൽ നിന്നാണ് പൊലീസ് ഇയാളെ അറസ്റ്റ് ചെയ്തത്. കുടുംബാംഗങ്ങൾക്കെതിരായ അക്രമത്തിന്റെ പേരിൽ ശിക്ഷിക്കപ്പെട്ട ഇയാൾ അടുത്തിടെയാണ് ജയിൽ മോചിതനായതെന്ന് പ്രതിയുടെ അമ്മ പൊലീസിനെ അറിയിച്ചു. അതേസമയം കൊലപാതകത്തിന്റെ കാരണം വ്യക്തമല്ല. കേസിൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
