പി. പി. ചെറിയാൻ
ന്യൂയോർക്ക് : മലങ്കര മാർത്തോമ്മാ സഭ ഈ മാസം 24 ന് ഡയസ്‌പോറ ഞായറായി (പ്രവാസി ഞായർ) ആചരിക്കും. മാർത്തോമ്മാ സഭയുടെ പ്രവാസി അംഗങ്ങളുടെ സംഭാവനകളെ ആദരിക്കുന്ന ദിനമായിട്ടാണ് പ്രവാസി ഞായറാഴ്ച ആചരിക്കുന്നതെന്ന് തിയോഡോഷ്യസ് മാർത്തോമ്മാ മെത്രാപ്പൊലീത്ത അറിയിച്ചു.
നോർത്ത് അമേരിക്ക ഭദ്രാസനത്തിലെ എല്ലാ ഇടവകകളും ഈ ദിവസം അർത്ഥവത്തായ രീതിയിൽ ആചരിക്കണം.സഭയുടെ ആത്മീയവും ഭൗതികവുമായ പുരോഗതിക്ക് പ്രവാസി അംഗങ്ങൾ നൽകുന്ന സഹകരണം ശ്ലാഘനീയമാണ്. ലോകത്തിന്‍റെ വിവിധ ഭാഗങ്ങളിൽ വസിക്കുന്ന മാർത്തോമ്മാ വിശ്വാസികൾ സഭയുടെ വ്യക്തിത്വം സജീവമായി ഉയർത്തിപ്പിടിക്കുകയും ആരാധനകളിലും സേവനങ്ങളിലും പങ്കെടുക്കുകയും ശുശ്രൂഷാ പ്രവർത്തനങ്ങളിൽ ആവേശത്തോടെ സംഭാവന ചെയ്യുകയും ചെയ്യുന്നു.
യുവാക്കളിൽ പലരും ഉന്നത വിദ്യാഭ്യാസത്തിനും ജോലിക്കുമായി ലോകത്തിന്‍റെ വിവിധ ഭാഗങ്ങളിൽ താമസിക്കുന്നു. ഈ യുവജനങ്ങൾക്ക് ആവശ്യമായ മാർഗനിർദേശം നൽകാനും അവരെ പ്രോത്സാഹിപ്പിക്കാനും അവർക്ക് ആത്മീയ കൂട്ടായ്മ നൽകാനുമുള്ള ഉത്തരവാദിത്തത്തെക്കുറിച്ച് പ്രാദേശിക സഭകളെയും ഇടവകകളെയും ഓർമിപ്പിക്കുന്നു.
പ്രവാസി ഞായറാഴ്ച ദൈവത്തിന്‍റെ മാർഗനിർദേശത്തിന് നന്ദി പ്രകടിപ്പിക്കുന്നതിനും പ്രവാസികളുടെ അനുഗ്രഹീതമായ ജീവിതത്തിനായി പ്രാർഥിക്കുന്നതിനുമായി വേർതിരിച്ചിരിക്കുന്നതാണ്. ഈ ദിവസം സഭയിലും സമൂഹത്തിലും ഫലപ്രദമായ ശുശ്രൂഷയെ പിന്തുണയ്ക്കുന്നതിനുള്ള അവസരമായി മാറണമെന്ന് മെത്രാപ്പൊലീത്ത കൂട്ടിച്ചേർത്തു.
