വാഷിങ്ടൺ: കനത്ത നാശം വിതച്ച ചുഴലിക്കാറ്റിന് പിന്നാലെ യു.എസ് സംസ്ഥാനങ്ങളായ വടക്കൻ കരോലിനയിലും തെക്കൻ കരോലിനയിലും പടർന്നുപിടിച്ച് കാട്ടുതീ. ഹെലികോപ്ടറുകളും എയർ ടാങ്കറുകളും ഉപയോഗിച്ച് തീ അണക്കാനുള്ള ശ്രമം തുടരുകയാണ്.
വടക്കൻ കരോലിനയുടെ പടിഞ്ഞാറൻ മേഖലയിലെ പോക് കൗണ്ടിയിൽനിന്ന് ആളുകളോട് ഒഴിഞ്ഞുപോകണമെന്ന് പൊതുസുരക്ഷാ വകുപ്പ് മുന്നറിയിപ്പ് നൽകിയിട്ടുണ്ട്. പുക മൂടി കാഴ്ച മറയാനും ഗതാഗതം സ്തംഭിക്കാനും സാധ്യതയുണ്ടെന്നും അടിയന്തരമായി മാറിത്താമസിച്ചില്ലെങ്കിൽ മരണപ്പെടാൻ സാധ്യതയുണ്ടെന്നാണ് മുന്നറിയിപ്പ് നൽകിയത്.
