റിപ്പബ്ലിക്കന്‍ പാര്‍ട്ടിയുടെ അമേരിക്കന്‍ പ്രസിഡന്റ് സ്ഥാനാര്‍ഥിയാണ് ശതകോടീശ്വരനായ വിവേക് രാമസ്വാമി. കുട്ടികളെ നോക്കാന്‍ വിവേക് രാമസ്വാമി ആയയെ തേടുന്നു എന്ന വാര്‍ത്തയാണ് ഇപ്പോള്‍ ചര്‍ച്ചയാവുന്നത്. ആയയ്ക്ക് നല്‍കാനൊരുങ്ങുന്ന ശമ്പളം 80 ലക്ഷം എന്നാണ് റിപ്പോര്‍ട്ടുകള്‍.
വിവേക് രാമസ്വാമി–അപൂര്‍വ ദമ്പതികള്‍ക്ക് രണ്ട് മക്കളാണുള്ളത്. 26 ആഴ്ച്ചയിലെ ജോലിക്കായാണ് 80 ലക്ഷം രൂപ പ്രതിഫലം നല്‍കുന്നതെന്നാണ് റിപ്പോര്‍ട്ടുകള്‍. അതിസമ്പന്നര്‍ക്ക് സേവനം നല്‍കുന്ന വെബ്സൈറ്റ് വഴിയാണ് ജോലി ലിസ്റ്റ് ചെയ്തിരിക്കുന്നത്.
ആഴ്ച്ചയില്‍ 84 മുതല്‍ 96 മണിക്കൂര്‍ വരെ ജോലി ചെയ്യാനാവണം. അതിന് ശേഷം ഒരാഴ്ച അവധി എടുക്കാം. ഷെഫ്, ആയമാര്‍, ഹൗസ്കീപ്പര്‍, സുരക്ഷ ഉദ്യോഗസ്ഥര്‍ എന്നിവരെ യോജിപ്പിച്ച് കൊണ്ടുപോകാന്‍ സാധിക്കുന്ന ആളായിരിക്കണം എന്നാണ് വേണ്ട യോഗ്യതയായി പറയുന്നത്. വിവേക് രാമസ്വാമിയുടെ പേരിലല്ല ജോലി ലിസ്റ്റ് ചെയ്തിരിക്കുന്നത്. എന്നാല്‍ നല്‍കിയിരിക്കുന്ന വിവരങ്ങള്‍ വെച്ച് നോക്കുമ്പോള്‍ രാമസ്വാമിയുടേതാണ് എന്നാണ് ബിസിനസ് ഇന്‍സൈഡര്‍ റിപ്പോര്‍ട്ട് ചെയ്യുന്നത്.
