പി.പി ചെറിയാൻ
റിച്ചിമണ്ട്, വിർജീനിയ: വിർജീനിയയിൽ ഡെമോക്രാറ്റിക് പാർട്ടി ഭരണം പിടിച്ചെടുത്തതിന് പിന്നാലെ സംസ്ഥാനത്ത് വൻതോതിലുള്ള നിയമപരിഷ്കാരങ്ങൾക്കും പുതിയ നികുതികൾക്കും വഴിതുറക്കുന്ന ബില്ലുകൾ അവതരിപ്പിച്ചു. ജനുവരി 17-ന് ഗവർണറായി ചുമതലയേറ്റ അബിഗയിൽ സ്പാൻബെർഗറുടെ (Abigail Spanberger) നേതൃത്വത്തിലുള്ള പുതിയ ഭരണകൂടം, ഒരാഴ്ചയ്ക്കുള്ളിൽ തന്നെ വിവാദപരമായ നിരവധി ബില്ലുകളാണ് പരിഗണനയ്ക്കായി വെച്ചിരിക്കുന്നത്.
ആമസോൺ, ഉബർ ഈറ്റ്സ് തുടങ്ങിയവ വഴിയുള്ള ഡെലിവറികൾക്ക് 4.3% അധിക വിൽപന നികുതി ഏർപ്പെടുത്താൻ നിർദ്ദേശമുണ്ട്. കൂടാതെ, ഉയർന്ന വരുമാനക്കാർക്കായി (6 ലക്ഷം ഡോളറിന് മുകളിൽ) 8% മുതൽ 10% വരെ പുതിയ ടാക്സ് ബ്രാക്കറ്റുകൾ കൊണ്ടുവരാനും നീക്കമുണ്ട്.
തോക്കുകൾക്കും വെടിക്കോപ്പുകൾക്കും 11% അധിക വിൽപന നികുതി, അസാൾട്ട് ആയുധങ്ങൾക്കും മാഗസിനുകൾക്കും നിരോധനം എന്നിവ ബില്ലുകളിൽ ഉൾപ്പെടുന്നു. തോക്ക് ഉപയോഗിച്ചുള്ള പരിശീലനത്തിനും കടുത്ത നിയന്ത്രണങ്ങൾ നിർദ്ദേശിച്ചിട്ടുണ്ട്.
ഇന്റർനെറ്റ് വഴി വോട്ട് ചെയ്യാനുള്ള സൗകര്യം, തിരഞ്ഞെടുപ്പ് കഴിഞ്ഞ് മൂന്ന് ദിവസം വരെ തപാൽ വോട്ടുകൾ സ്വീകരിക്കൽ, റാങ്ക്ഡ് ചോയ്സ് വോട്ടിംഗ് രീതി വ്യാപിപ്പിക്കൽ തുടങ്ങിയവയാണ് പ്രധാന നിർദ്ദേശങ്ങൾ.
ഗ്യാസിൽ പ്രവർത്തിക്കുന്ന ഇല പൊഴിക്കുന്ന യന്ത്രങ്ങൾക്ക് (Leaf blowers) നിരോധനം, അനധികൃത കുടിയേറ്റക്കാർക്ക് സൗജന്യ വിദ്യാഭ്യാസം ഉറപ്പാക്കൽ, റോബറി പോലുള്ള കുറ്റകൃത്യങ്ങളുടെ ശിക്ഷാ കാലാവധി കുറയ്ക്കൽ എന്നിവയും ഡെമോക്രാറ്റുകളുടെ അജണ്ടയിലുണ്ട്.
മിതവാദി എന്ന് സ്വയം വിശേഷിപ്പിച്ചിരുന്ന സ്പാൻബെർഗർ ഗവർണർ സ്ഥാനത്തെത്തിയതോടെ പാർട്ടിയിലെ തീവ്ര ഇടതുപക്ഷ നിലപാടുകൾ നടപ്പിലാക്കുകയാണെന്ന് റിപ്പബ്ലിക്കൻ നേതാക്കൾ കുറ്റപ്പെടുത്തി. വിർജീനിയയെ ഒരു ‘സോഷ്യലിസ്റ്റ് മാനിഫെസ്റ്റോ’യിലേക്ക് നയിക്കാനാണ് ഈ ശ്രമമെന്ന് രാഷ്ട്രീയ നിരീക്ഷകർ അഭിപ്രായപ്പെടുന്നു. ഭരണഘടനയുടെയും നികുതി വ്യവസ്ഥയുടെയും അടിത്തറ മാറ്റുന്ന ഈ നീക്കങ്ങൾ വിർജീനിയയിലെ ജനങ്ങൾക്കിടയിൽ വൻ ചർച്ചകൾക്ക് തുടക്കമിട്ടിട്ടുണ്ട്.
