തിരുവനന്തപുരം: പലസ്തീൻ ഐക്യദാർഢ്യ റാലി പ്രഖ്യാപിച്ച് കോൺഗ്രസ്. നവംബർ 25 ന് കോഴിക്കോട് വെച്ചാണ് ഐക്യദാർഢ്യ റാലി. മുസ്ലിം ലീഗിനും സിപിഐഎമ്മിനും പിന്നാലെയാണ് കോൺഗ്രസ് റാലി. റാലി ശക്തി പ്രകടനമാക്കാനാണ് കോഴിക്കോട് ഡിസിസിയുടെ തീരുമാനം.
സിപിഐഎം റാലിക്ക് മറുപടിയായാണ് കോൺഗ്രസ് റാലി സംഘടിപ്പിക്കുന്നത്. കോൺഗ്രസ് പലസ്തീനൊപ്പമല്ലെന്നും ഐക്യദാർഢ്യ റാലി നടത്തിയ ആര്യാടൻ ഷൗക്കത്തിനെതിരെ നടപടി സ്വീകരിക്കുകയാണെന്നുമുളള ആരോപണം സിപിഐഎമ്മിന്റെ ഭാഗത്ത് നിന്നുണ്ടായിരുന്നു. ഇത്തരം ആരോപണങ്ങളെ മറികടക്കാനാണ് കോൺഗ്രസിന്റെ നീക്കം.
ലീഗ് നടത്തിയ പോലത്തെ മഹാറാലി ലോകത്ത് ആർക്കും നടത്താൻ കഴിയില്ലെന്നും പരിപാടി നടത്താൻ ഓരോ പാർട്ടികൾക്കും ഓരോ രീതിയുണ്ടെന്നും പ്രതിപക്ഷ നേതാവ് വി ഡി സതീശൻ പാണക്കാട്ട് മുസ്ലിംലീഗ് നേതാക്കളെ കണ്ട ശേഷം പ്രതികരിച്ചിരുന്നു. ഏകസിവിൽകോഡിൽ കോൺഗ്രസ് വലിയ സെമിനാർ നടത്തിയതാണെന്നും വി ഡി സതീശൻ പറഞ്ഞു.
സിപിഐഎം റാലിയിലേക്ക് മുസ്ലിം ലീഗിനെ ക്ഷണിച്ചതും കോൺഗ്രസിന് തലവേദനയുണ്ടാക്കിയിരുന്നു. എന്നാൽ സിപിഐഎം ക്ഷണം ലീഗ് തളളി. സിപിഐഎം റാലിയിൽ പങ്കെടുക്കുന്നത് രാഷ്ട്രീയപരമായ തെറ്റിദ്ധാരണയ്ക്ക് വഴിവെക്കും. കോൺഗ്രസിന്റെ എതിർപ്പിനെ മറികടന്നുള്ള നീക്കം ഭാവിയിൽ വലിയ ദോഷമാകുമെന്നുമായിരുന്നു ലീഗ് നേതൃത്വത്തിന്റെ വിലയിരുത്തൽ.
പലസ്തീൻ ഐക്യദാർഢ്യ റാലിയിലേക്ക് ലീഗിനെ ഇനിയും ക്ഷണിക്കുമെന്ന് പി മോഹനൻ
റാലിയിൽ പങ്കെടുക്കണമെന്ന ലീഗ് നേതാവ് ഇ ടി മുഹമ്മദ് ബഷീറിന്റെ അഭിപ്രായം വലിയ ചർച്ചയായിരുന്നു. പലസ്തീൻ ഐക്യദാർഢ്യ റാലിയിലേക്ക് സിപിഐഎം ക്ഷണിച്ചാൽ ലീഗ് പങ്കെടുക്കുമെന്നാണ് ഇ ടി മുഹമ്മദ് ബഷീർ പറഞ്ഞത്. ക്ഷണിച്ചാൽ ഉറപ്പായും പങ്കെടുക്കും. ഏക സിവിൽ കോഡ് സെമിനാറിൽ പങ്കെടുക്കാത്തതിന്റെ സാഹചര്യം വേറെയാണ്. പരിപാടിയിൽ ലീഗിന് പങ്കെടുക്കാവുന്നതാണ്. പലസ്തീൻ വിഷയത്തിൽ എല്ലാവരും ഒറ്റക്കെട്ടായി നിൽക്കണമെന്നും ഇ ടി മുഹമ്മദ് ബഷീർ പറഞ്ഞത്. മുസ്ലിംലീഗിനെ ഇനിയും റാലിയിലേക്ക് ക്ഷണിക്കുമെന്നാണ് ഇന്ന് കോഴിക്കോട് ജില്ലാ സിപിഐഎം സെക്രട്ടറി പി മോഹനൻ പറഞ്ഞത്.
