ദുബൈയിലേക്ക് വരുന്ന വിമാനങ്ങൾക്ക് നിയന്ത്രണം ഏർപ്പെടുത്തി. മഴക്കെടുതിയിൽ വിമാനത്താവളത്തിലുണ്ടായ തകരാർ പരിഹരിക്കാൻ 48 മണിക്കൂറാണ് നിയന്ത്രണം. ഏപ്രിൽ 19 ഉച്ച 12 മുതൽ 48 മണിക്കൂറാണ് ദുബൈ വിമാനത്താവളത്തിലേക്ക് വരുന്ന വിമാനങ്ങൾക്ക് നിയന്ത്രണം ഏർപ്പെടുത്തിയത്. ദുബൈയിൽ നിന്ന് പുറപ്പെടുന്ന വിമാനങ്ങൾക്ക് ഇത് ബാധകമല്ല. മഴയുടെ പ്രത്യാഘാതങ്ങൾ മറികടക്കാനുള്ള നടപടികളുടെ ഭാഗമായാണ് വരുന്ന വിമാനങ്ങളെ നിയന്ത്രിക്കുന്നതെന്ന് അധികൃതർ പറഞ്ഞു.
അതേസമയം, ദുബൈയിലേക്കുള്ള വിമാനസർവീസുകൾ എയർ ഇന്ത്യ റദ്ദാക്കി. ഈ മാസം 21 വരെ ടിക്കറ്റ് ബുക്ക് ചെയ്തവർക്ക് സൗജന്യമായി മറ്റൊരു ദിവസത്തെ യാത്രക്ക് ടിക്കറ്റ് നൽകുമെന്ന് എയർ ഇന്ത്യ അധികൃതർ അറിയിച്ചു. ഈ മാസം 30 വരെ ഇസ്രായേൽ സർവീസും എയർ ഇന്ത്യ റദ്ദാക്കിയിട്ടുണ്ട്. എന്നാൽ, എയർ ഇന്ത്യ എക്സ്പ്രസ് വിമാനങ്ങളെ ഇത് ബാധിക്കില്ല.
