ദുബൈ: കേരള ഹയർസെക്കൻഡറി പ്ലസ്ടു പരീക്ഷയിൽ ഗൾഫിൽ 88.03 % വിജയം. 81 വിദ്യാർഥികൾ മുഴുവൻ വിഷയങ്ങളിലും എപ്ലസ് നേടി. യു.എ.ഇയിലെ എട്ട് സ്‌കൂളുകളിൽ നിന്ന് 574 പേരാണ് കേരള ഹയർസെക്കൻഡറി പ്ലസ്ടു പരീക്ഷക്ക് രജിസ്റ്റർ ചെയ്തിരുന്നത്. ഇവരിൽ 568 പേർ പരീക്ഷയെഴുതിയപ്പോൾ 500 പേരും ഉപരിപഠനത്തിന് യോഗ്യത നേടി. വിജയം 88.03 ശതമാനം. 81 വിദ്യാർഥികൾ മുഴുവൻ വിഷയങ്ങളിലും എപ്ലസ് നേടി മികവ് കാട്ടി.
124 പേർ പരീക്ഷയെഴുതിയ അബൂദബി മോഡൽ സ്‌കൂളിൽ എല്ലാവരും പാസായി. 38 പേർ എല്ലാവിഷയത്തിലും എ പ്ലസ് കരസ്ഥമാക്കി. ഇവിടെ 125 പേർ പരീക്ഷക്ക് രജിസ്റ്റർ ചെയ്തിരുന്നെങ്കിലും ഒരാൾ പരീക്ഷക്ക് ഹാജരായില്ല. 43 പേർ പരീക്ഷയെഴുതിയ ഷാർജ ന്യൂ ഇന്ത്യൻ മോഡൽ സ്‌കൂൾ നൂറുമേനി വിജയം കൊയ്തു. ഇവിടെ ഒമ്പത് പേർക്ക് മുഴുവൻ വിഷയങ്ങളിലും എപ്ലസുണ്ട്.
