ന്യൂഡൽഹി : ചന്ദ്രയാൻ 3 ദൗത്യം വിജയകരമാക്കിയ ഐഎസ്ആർഒയ്ക്ക് അഭിനന്ദന പ്രവാഹം. വിവിധ മേഖലകളിലെ പ്രമുഖർ ഐഎസ്ആർഒയ്ക്കും ശാസ്ത്രജ്ഞർക്കും അഭിനന്ദനം അർപ്പിച്ച് രംഗത്തെത്തി.
ചന്ദ്രയാൻ ദൗത്യം വിജയകരമാക്കിയതിലൂടെ ചരിത്രം രചിക്കുക മാത്രമല്ല, ഭൂമിശാസ്ത്രം തന്നെ മാറ്റിയിരിക്കുകയാണ് ഐഎസ്ആർഒ ശാസ്ത്രജ്ഞർ ചെയ്തിരിക്കുന്നതെന്ന് രാഷ്ട്രപതി ദ്രൗപദി മുർമു പറഞ്ഞു. ജീവിതത്തിൽ ഒരിക്കൽ മാത്രം സംഭവിക്കുന്ന നിമിഷമാണിത്. ഇന്ത്യക്കാർക്കെല്ലാം അഭിമാനമുണ്ട്. ഐഎസ്ആർഒയ്ക്കും ദൗത്യത്തിൽ പങ്കാളികളായ എല്ലാവർക്കും അഭിനന്ദനം അറിയിക്കുന്നുവെന്നും രാഷ്ട്രപതി അറിയിച്ചു.
