പത്തനംതിട്ട: പത്തനംതിട്ട ലോക്സഭാ മണ്ഡലം എൽഡിഎഫ് സ്ഥാനാർത്ഥി തോമസ് ഐസക്കിന്റെ മുഖാമുഖം പരിപാടിയിൽ പങ്കെടുക്കാൻ കുടുംബശ്രീ അംഗങ്ങൾക്ക് നിർദ്ദേശം. കുന്നന്താനം പഞ്ചായത്ത് സിഡിഎസ് ചെയർപേഴ്സൺ രഞ്ജിനി അജിത്താണ് അംഗങ്ങൾക്ക് നിർദേശം നൽകിയത്. കുടുംബശ്രീയുടെ നേട്ടത്തിന് പിന്നിൽ തോമസ് ഐസക്കാണെന്ന് ചൂണ്ടിക്കാട്ടിയാണ് അംഗങ്ങൾ മുഖാമുഖത്തിൽ പങ്കെടുക്കണമെന്ന് സിഡിഎസ് ചെയർപേഴ്സൺ കർശനമായി നിർദേശിച്ചത്.
”നാളെ നടക്കുന്ന മുഖാമുഖം പരിപാടിയിൽ ഒരു യൂണിറ്റിൽ നിന്ന് പ്രസിഡന്റും സെക്രട്ടറിയും ഉൾപ്പെടെ അഞ്ച് അംഗങ്ങൾ നിർബന്ധമായും പങ്കെടുക്കണം. സംരംഭകരും മറ്റ് ഗ്രൂപ്പുകളും ഈ മീറ്റിംഗിൽ പങ്കെടുക്കേണ്ടതാണ്. കുടുംബശ്രീ സ്ഥാപിതമായിട്ട് 25 വർഷം പിന്നിടുകയാണ്. അന്നുമുതൽ കൈവരിച്ച ഓരോ നേട്ടത്തിന് പിന്നിലും ഐസക് സാറിന്റെ പ്രവർത്തനമാണ്. കുടുംബശ്രീയുടെ തുടക്കം മുതലുള്ള പദ്ധതികളിൽ നല്ലൊരു സ്ഥാനം വഹിച്ചത് നമ്മുടെ ഐസക് സാറാണ്. അടുത്ത വർഷത്തേക്കുള്ള പ്രോജക്ടുകളും സാർ ഇപ്പോഴേ ചെയ്തുവച്ചിട്ടുണ്ട്.
കുടുംബശ്രീയുടെ പ്രവർത്തനമേഖലയ്‌ക്ക് പിന്നിൽ ഐസക്ക് സാറിന്റെ കാഴ്ചപ്പാടാണ്. ഈ കാഴ്ചപ്പാടെല്ലാം നമ്മോട് പങ്കിടാനും, അത് പോലെ തന്നെ ഇനി നടക്കാനിരിക്കുന്ന ഓരോ പ്രവർത്തനങ്ങളെ പറ്റിയും സാറിലൂടെ മനസ്സിലാക്കുവാനും സാറിനോട് നമ്മുടെ ഓരോ സംശയങ്ങളും നേരിട്ട് ചോദിക്കാനും അറിയാനുമുള്ള അവസരമാണിത്. ഈ അവസരം നിങ്ങളെല്ലാവരും പ്രയോജനപ്പെടുത്തണം. അതിനായി എല്ലാവരും നാളെ രാവിലെ 10 മണിക്ക് കുന്നന്താനം കമ്മ്യൂണിറ്റി ഹാളിൽ എത്തിച്ചേരണം” – ഓഡിയോ സന്ദേശത്തിൽ പറയുന്നു.
