ന്യൂഡൽഹി: രണ്ടര വർഷത്തിനിടെ വിദേശയാത്രക്കായി പ്രധാനമന്ത്രി നരേന്ദ്ര മോദി ചെലവഴിച്ചത് 258 കോടി രൂപ. 2022 മെയ് മുതൽ 2024 ഡിസംബർ വരെയുള്ള കാലയളവിൽ 38 വിദേശയാത്രകളാണ് പ്രധാനമന്ത്രി നടത്തിയത്. 2023 ജൂണിൽ യുഎസ്സിലേക്ക് നടത്തിയ യാത്രയാണ് ഇതിൽ ഏറ്റവും ചെലവേറിയത്. 22 കോടി രൂപയാണ് ഈ യാത്രക്ക് ചെലവായത്.
മല്ലികാർജുൻ ഖാർഗെയുടെ ചോദ്യത്തിന് മറുപടിയായി വിദേശകാര്യ സഹമന്ത്രി പബിത്ര മാർഗരീത്തയാണ് രാജ്യസഭയിൽ ഇക്കാര്യങ്ങൾ പറഞ്ഞത്. കഴിഞ്ഞ മൂന്ന് വർഷത്തിനിടെ പ്രധാനമന്ത്രിയുടെ വിദേശയാത്രകൾക്കായി ഇന്ത്യൻ എംബസികൾ ചെലവിട്ട തുകയുടെ വിശദമായ കണക്കാണ് ഖാർഗെ ചോദിച്ചത്. ഓരോ യാത്രയിലേയും ഹോട്ടൽ സൗകര്യങ്ങൾ, സ്വീകരണങ്ങൾ, ഗതാഗതം തുടങ്ങിയവയുടെ ചെലവുകൾ പ്രത്യേകമായി നൽകാനും അദ്ദേഹം ആവശ്യപ്പെട്ടിരുന്നു.
