തിരുവനന്തപുരം: സിഎംആര്എല് സാമ്പത്തിക തട്ടിപ്പ് കേസില് എസ്എഫ്ഐഒ റിപ്പോര്ട്ട് തള്ളി വീണ ടി. സേവനം നല്കാതെ പണം കൈപ്പറ്റിയിട്ടില്ലെന്ന് വീണ പ്രതികരിച്ചു. സേവനം നല്കിയിട്ടില്ലെന്ന് മൊഴി നല്കി എന്ന വാര്ത്ത വസ്തുതാ വിരുദ്ധമാണെന്നും വീണ പറഞ്ഞു. സിഎംആര്എല് സാമ്പത്തിക തട്ടിപ്പ് കേസില് ആദ്യമായാണ് വീണയുടെ പ്രതികരണം.
‘സിഎംആര്എല്ലില് നിന്ന് കരാറനുസരിച്ചുള്ള സേവനങ്ങള് നല്കാതെ പണം കൈപ്പറ്റി എന്ന് എസ്എഫ്ഐഓയ്ക്ക് ഞാന് സ്റ്റേറ്റ്മെന്റ് നല്കി എന്ന പ്രചാരണം തികച്ചും വസ്തുതാവിരുദ്ധമാണ്. ഇത്തരം ചില വാര്ത്തകള് വ്യാപകമായി പ്രചരിപ്പിക്കുന്നത് ശ്രദ്ധയില്പ്പെട്ടു. ഇപ്പോള് ചിലര് പ്രചരിപ്പിക്കുന്ന തരത്തില് ഒരു മൊഴിയും ഞാന് നല്കിയിട്ടില്ല. ഞാന് അന്വേഷണ ഉദ്യോഗസ്ഥന് മുമ്പാകെ മൊഴി നല്കുകയും അത് അവര് രേഖപ്പെടുത്തുകയും ചെയ്തിട്ടുണ്ട് എന്നത് വസ്തുതയാണ്. പക്ഷേ ഞാനോ എക്സാലോജിക് സൊല്യൂഷന്സോ സേവനങ്ങള് നല്കാതെ സിഎംആര്എല്ലില് നിന്ന് എന്തെങ്കിലും പണം കൈപ്പറ്റി എന്ന തരത്തിലുള്ള ഏതെങ്കിലും മൊഴി അവിടെ നല്കിയിട്ടില്ല. വാസ്തവ വിരുദ്ധമാണ് ഇത്തരം പ്രചാരണങ്ങളെന്ന് ഒരിക്കല് കൂടി വ്യക്തമാക്കുന്നു.’, വീണ ടി പ്രസ്താവനയില് പറഞ്ഞു.
