തിരുവനന്തപുരം: സിപിഎം സംസ്ഥാന സെക്രട്ടറിയേറ്റിൽ നിന്ന് മുഖ്യമന്ത്രി പിണറായി വിജയൻ വിലക്കിയെന്ന വാർത്ത തള്ളി പി.കെ ശ്രീമതി. വാർത്ത വസ്തുതാ വിരുദ്ധമെന്ന് ശ്രീമതി ഫേസ്ബുക്കിൽ കുറിച്ചു.
സംസ്ഥാന സെക്രട്ടേറിയറ്റിൽ പങ്കെടുക്കാൻ ശ്രീമതിയെ അനുവദിച്ചില്ലെന്നായിരുന്നു പുറത്ത് വന്ന വാര്ത്തകള്. കേന്ദ്ര കമ്മിറ്റി ശ്രീമതിക്ക് പ്രായപരിധി ഇളവ് അനുവദിച്ചിരുന്നു. എന്നാല് സംസ്ഥാനത്ത് ഇളവ് ഒന്നും നൽകിയിട്ടില്ലെന്ന് ശ്രീമതിയോട് പിണറായി അറിയിച്ചെന്നുമായിരുന്നു വാര്ത്ത. എന്നാല് ഇത് നിഷേധിച്ചാണ് ശ്രീമതി രംഗത്തെത്തിയത്. ഇന്നലെ നടന്ന സംസ്ഥാന സമിതി യോഗത്തിൽ പി.കെ ശ്രീമതി പങ്കെടുത്തിരുന്നുവെന്ന് മന്ത്രി മുഹമ്മദ് റിയാസ് പ്രതികരിച്ചു.കൂടുതൽ വിവരങ്ങൾ അറിയില്ലെന്നും മന്ത്രി പറഞ്ഞു.
