കുളിമുറിയിൽ വീണ് പരിക്കേറ്റ മലയാളി സ്‌കൂൾ ജീവനക്കാരി സൗദിയിൽ മരിച്ചു

റിയാദ്: സൗദി അറേബ്യയിലെ തബുക്ക് ഇന്റർനാഷണൽ സ്‌കൂൾ ജീവനക്കാരി കോട്ടയം തൃക്കൊടിത്താനം സ്വദേശി റജീന ശരീഫ് (57) മരിച്ചു. കുളിമുറിയിൽ കാൽ തെറ്റി വീണതിനെ തുടർന്ന് തലക്ക് പരിക്കേറ്റ് തബുക്ക് കിംഗ് ഖാലിദ് ആശുപത്രിയിൽ തീവ്രപരിചരണ വിഭാഗത്തിൽ കഴിയവേ, തുടർചികിത്സക്കായി എയർ ആംബുലൻസിന്റെ സഹായത്തോടെ മദീന കിംഗ് ഫഹദ് ആശുപത്രിയിൽ എത്തിച്ചെങ്കിലും, ചികിത്സയിലിരിക്കെ ഇന്നലെ ഉച്ചയോടെ മരണപ്പെട്ടു. പരേതയുടെ ജനാസ ജന്നത്തുൽ ബഖീയയിൽ ഖബറടക്കും. മരണാനന്തര കർമ്മങ്ങൾക്കും മറ്റ് സഹായങ്ങൾക്കും മദീന കെ.എം.സി.സി വെൽഫയർ വിങ്ങ് രംഗത്തുണ്ട്. 20 വർഷമായി റജീന ഈ സ്‌കൂളിൽ ജോലി ചെയ്യുന്നു. മൂന്ന് മക്കളുണ്ട്. ഭർത്താവ് ശരീഫും അബഹായിൽ സ്റ്റാഫ് നഴ്‌സായി ജോലി ചെയ്യുന്ന മകളും മദീനയിൽ ആശുപത്രിയിൽ അവർക്കൊപ്പം ഉണ്ടായിരുന്നു.