കോയമ്പത്തൂർ അന്താരാഷ്ട്ര വിമാനത്താവളത്തിലെത്തിയ മലയാളി യാത്രക്കാരന്റെ ഷൂസിനടിയിൽ വെടിയുണ്ട കണ്ടെത്തി

കോയമ്പത്തൂർ: ദുബൈയിലേക്ക് പോകാനായി കോയമ്പത്തൂർ അന്താരാഷ്ട്ര വിമാനത്താവളത്തിലെത്തിയ മലയാളി യാത്രക്കാരന്റെ ഷൂസിനടിയിൽ വെടിയുണ്ട. എറണാകുളം സ്വദേശി ഷിബു മാത്യു (48) ആണ് പിടിയിലായത്.സിഐഎസ്എഫ് ഉദ്യോഗസ്ഥരാണ് യാത്രക്കാരന്റെ ഷൂസിനടിയിൽ നിന്ന് വെടിയുണ്ട കണ്ടെത്തിയത്. ഞായറാഴ്ചയാണ് സംഭവം ഉണ്ടായത്. യാത്രക്കാരനെ പീലമേട് പൊലീസ് സ്റ്റേഷന് കൈമാറി. സംഭവത്തിൽ കേസ് രജിസ്റ്റർ ചെയ്തു. കഴിഞ്ഞ 10 വർഷമായി ദുബൈയിലെ ഒരു ഇൻഷുറൻസ് കമ്പനിയിൽ ജോലി ചെയ്യുകയാണ് ഇയാൾ. ഉച്ചകഴിഞ്ഞ് ഇൻഡിഗോ വിമാനത്തിൽ പോകാനായി വിമാനത്താവളത്തിലെത്തിയതാണ് ഇയാൾ. ഷിബുവിന്റെ ലഗേജും ചെരുപ്പും സ്‌കാൻ ചെയ്യുന്നതിനിടെയാണ് വെടിയുണ്ട കണ്ടെത്തിയത്. 0.22 എംഎം ലൈവ് ബുള്ളറ്റാണ് ഷൂസിന്റെ അടിയിൽ കുടുങ്ങിയ നിലയിൽ കണ്ടത്. യാത്രയ്ക്ക് മുമ്പുള്ള പതിവ് പരിശോധനയിലാണ് സിഐഎസ്എഫ് ഉദ്യോഗസ്ഥർ വെടിയുണ്ട കണ്ടെത്തിയത്. വെടിയുണ്ട ഷൂസിൽ കുടുങ്ങിയത് എങ്ങനെയാണെന്ന് അറിയില്ലെന്ന് ഇയാൾ പറഞ്ഞെങ്കിലും പൊലീസ് കേസെടുത്തു. അന്വേഷണം ആരംഭിച്ചു.