തിരുവനന്തപുരം: മുഖ്യമന്ത്രിയുടേയും മന്ത്രിമാരുടെയും മണ്ഡലപര്യടനത്തിന്റെ ചെലവ് സഹകരണ ബാങ്കുകള്‍ക്കും സംഘങ്ങള്‍ക്കും വഹിക്കാന്‍ സഹകരണ സംഘം രജിസ്ട്രാര്‍ അനുമതി നല്‍കി. ചെലവ് ഏറ്റെടുക്കാന്‍ പ്രത്യേക അനുമതി നല്‍കണമെന്ന സര്‍ക്കാരിന്റെ നിര്‍ദേശത്തെ തുടര്‍ന്നാണ് ഈ നടപടി.
മണ്ഡലങ്ങളില്‍ മുഖ്യമന്ത്രിയും മന്ത്രിമാരും ഔദ്യോഗിക പര്യടനം നടത്തി പ്രമുഖ വ്യക്തികളുമായി കൂടിക്കാഴ്ചയും മണ്ഡലം കേന്ദ്രീകരിച്ച് ബഹുജന സദസ്സും നടത്താന്‍ തീരുമാനിച്ചിട്ടുണ്ട്. ഇത് സംഘടിപ്പിക്കാനുള്ള ചെലവ് സഹകരണ ബാങ്കുകളും സംഘങ്ങളും വഹിക്കാമെന്നുമാണ് സര്‍ക്കുലറിലെ നിര്‍ദേശം.
രജിസ്ട്രാറുടെ നിയന്ത്രണത്തിലുള്ള എല്ലാ സഹകരണ സംഘങ്ങള്‍ക്കും ഈ പരിപാടിയുടെ ചെലവിലേക്ക് ആവശ്യമായ അത്രയും തുക ചെലവഴിക്കാനാണ് അനുമതി നല്‍കിയിരിക്കുന്നത്., പരിധി നിശ്ചയിച്ചിട്ടുമില്ല. നേരത്തെ കേരളീയം പരിപാടിയുടെ ചെലവിലേക്കും സംഘങ്ങളില്‍ നിന്നും പണം പിരിച്ചിരുന്നു.
