ആറ് ജിസിസി രാജ്യങ്ങൾക്കിടയിൽ ഒറ്റ വിസയിൽ സഞ്ചരിക്കാൻ അനുവാദം നൽകുന്ന ഏകീകൃത ഗൾഫ് ടൂറിസ്റ്റ് വിസ പദ്ധതിക്ക് ജിസിസി ആഭ്യന്തര മന്ത്രിമാരുടെ യോഗം അംഗീകാരം നൽകി. ഒമാനിലെ മസ്കറ്റിൽ നടന്ന ജിസിസി ആഭ്യന്തര മന്ത്രിമാരുടെ 40-ാമത് യോഗത്തിലാണ് തീരുമാനം.
ഗൾഫ് രാജ്യങ്ങളിലെ താമസക്കാരുടെയും വിനോദസഞ്ചാരികളുടെയും സഞ്ചാരം സുഗമമാക്കുന്നതിനാണ് ഏകീകൃത ഗൾഫ് ടൂറിസ്റ്റ് വിസ പദ്ധതിക്ക് മന്ത്രിമാർ അംഗീകാരം നൽകിയത്. ഈ നടപടി സാമ്പത്തിക, ടൂറിസം മേഖലകളിൽ ഗുണപരമായ പ്രത്യാഘാതങ്ങൾ ഉണ്ടാക്കുമെന്ന് മന്ത്രിമാർ പ്രത്യാശ പ്രകടിപ്പിച്ചു.
ജിസിസി ആഭ്യന്തര മന്ത്രിമാർ സംയുക്ത സുരക്ഷാ സഹകരണ മേഖലയിലും ജിസിസി രാജ്യങ്ങളിലെ പൗരന്മാർക്കും താമസക്കാർക്കും താൽപ്പര്യമുള്ള ഇലക്ട്രോണിക് പ്രോജക്റ്റുകളുടെ വികസനത്തിലും നിരവധി സുപ്രധാന വിഷയങ്ങൾ ചർച്ച ചെയ്തു.
ജിസിസി രാജ്യങ്ങൾക്കിടയിൽ ഗതാഗത നിയമലംഘനങ്ങൾ ഇലക്ട്രോണിക് രീതിയിൽ ബന്ധിപ്പിക്കുന്നതിനുള്ള പദ്ധതിയുടെ ആദ്യഘട്ടം ആരംഭിക്കുന്നതിനും മന്ത്രിമാർ അംഗീകാരം നൽകി. ഗൾഫിനും ആഗോള സമൂഹത്തിനും എല്ലാ തലങ്ങളിലും ഭാരമായി മാറിയ മയക്കുമരുന്നിനെ ചെറുക്കുന്നതിന് അനുയോജ്യമായ ഒരു സമഗ്ര ഗൾഫ് തന്ത്രം വികസിപ്പിക്കാനുള്ള നിർദ്ദേശവും അവർ സ്വീകരിച്ചു.
