ഷാര്‍ജ അന്താരാഷ്ട്ര ചലച്ചിത്രോത്സവത്തിന് ഈ മാസം 22 ന് തുടക്കമാകും. ഇന്ത്യയുൾപ്പെടെ 37 രാജ്യങ്ങളിൽ നിന്നുള്ള ചിത്രങ്ങൾ മേളയിൽ പ്രദർശിപ്പിക്കും. ഷാർജ അൽസാഹിയ സിറ്റി സെന്ററിൽ ഈമാസം 28 വരെയാണ് ചലച്ചിത്ര മേള നടക്കുക.
37 രാജ്യങ്ങളില്‍ നിന്ന് 81 ചിത്രങ്ങള്‍ മേളയിലെത്തും. കുട്ടികൾക്കും യുവാക്കൾക്കുള്ള സിനിമകളാണ് ഷാർജ ചലച്ചിത്ര മേളയുടെ പ്രത്യേകത. ഭൂട്ടാന്‍, മോണ്ടിനെഗ്രോ, മാള്‍ട്ട, ടോഗോ, വിയറ്റ്‌നാം എന്നീ രാജ്യങ്ങള്‍ ഇത്തവണ ആദ്യമായി പങ്കെടുക്കും. പത്താം വാര്‍ഷികത്തിന്റെ ഭാഗമായി ഷാര്‍ജ ഫിലിം ഡേയ്‌സ് എന്ന പ്രത്യേക പരിപാടിയും അരങ്ങേറും.
ചലച്ചിത്രോത്സവം മൂന്ന് സിനിമകളുടെ ആഗോള കന്നിപ്രദർശനത്തിനും വേദിയാകും. 43 ചിത്രങ്ങളുടെ മിഡിലീസ്റ്റിലെ ആദ്യ പ്രദർശനവും ഇവിടെ നടക്കും. 15 സംവിധായകരും സിനിമാ വിദഗ്ധരും പങ്കെടുക്കും. 20 വിധികര്‍ത്താക്കളും 17 അംബാസഡർമാരും എത്തും. 90 രാജ്യങ്ങളില്‍ നിന്നുള്ള 1710 പ്രതിനിധികളെയാണ് ചലച്ചിത്രോത്സവത്തിൽ പ്രതീക്ഷിക്കുന്നത്.
